Mga remedy sa eczema (1)

Ang eczema, termino kini sa medikal nga kondisyones sa atong panit, maingon nga sama sa pangagod, mahasol kita sa grabeng kakatol niini.

Usa kini ka laygay nga kakulian sa panit (chronic skin disorder), komon kining problemaha didto sa Amerika, nga nag-antos sa pagpuypoy sa kakatol sa eczema.

Ang eczema, motakboy sa mga tawo nga wa magpili og edad. Hinuon, mas motumaw kini, ilabi na sa mga gagmay pa nga bata, o mga masuso pa kaysa mga hamtong na. Segun sa report, didto sa Amerika, apektado ang 30% sa mga masuso ug 3% sa mga bata ug hamtong.

Motakboy ang eczema sa bisan asa nga parte sa lawas, sama sa tuhod, kilay, kamot, nawong, tikod ug uban pa. Mga sintomas angay sab maobserbahan kon duna ka ba niini sama sa mga mosunod;

Implamasyon, nag-ugang panit, namula, o gasgason nga mora’g himbison unya nangliskad ug kanunay lang mangatol...ug mga nagpat-ak-pat-ak nga lagom sa panit (dark patches).

Bisan pa niini, ang eczema matud pa sa mga eksperto wala sila’y gitumbok nga klarong hinungdan niini. Apan sa nadiskubrehan sa ‘researchers’, epekto lang kini sa subrang reaksiyons, o pagresponde gikan sa sistema sa imyun sa atong lawas.

Ang eczema, mahimo sab nga may kalabotan kini sa atong kaliwat, nga sagad sa mga pamilya, adunay kaagi sa hubak, o ubang isyu sa ‘allergy’. Usahay gyud makuridas na lang sa ubang mga sintomas nga diay na-develop gumikan sa senyales sa eczema.

Ang sintomas nga duna ka’y eczema mao nga kanunay ka nga kutasan sa kakulba (emosyonal stress) ug pirme ka nga panington pag-ayo.