Brgy San Jose, Cebu City
“Ako lang ireklamo kining among silingan diri sa Purok 5 kay mura man og sila ang nakapanag-iya sa sapa kay sila na man ang magbuot, unya nagsukod sa yuta apil ang sapa bisan og wa’y pirma gikan sa mayor ug sa kapitan”
Brgy Binaliw, Cebu City
“Naunsa na man intawon kining karsada namo diri nga puwerte na man lang gyud nga gubaa. Ang mga dagkong truck nga maghakot sa anapog gikan sa usa ka quary diri maoy nakapasamot pagkaguba sa karsada.”
Brgy Lorega-San Miguel, Cebu City
“Diri sa Sitio San Roque sa may Imus road kay daghan kaayong mga iring ug iro nga gipangbuhian lang sa mga tag-iya. Ang nakaproblema kay may napaakan na nga mga bata diri.”
Brgy Ilaya, San Fernando, Cebu
“Naghitak na usab ang shabu ug sugal diri sa among lugar pero wala may gibuhat ang mga polis. Naa tingali gisaligan ang mga pusher diri kay maghinambog man nga dili sila madakpan.
Brgy Poblacion, Cordova, Cebu
“Makapakugang kaayo ang mabayran kun molukat ka og police clearance diri sa among lungsod kay tag P175. Ang mabayran sa treasurer’s office kay P75 ra, pero sa polis kay P100 gyud, pero wala’y ihatag nga resibo.”
Brgy Taytay, Danao City
“Naay mga batan-on nga halos kada gabii maglangas unya dili pa gyud taga diri sa among lugar. Wala may gibuhat ang mga tanod sa among lugar bisan og pagbadlong lang unta sa mga batan-on.”
Brgy Babag, Lapu-Lapu City
“Magpatabang unta mi sa taga PDEA-7 kay diri sa Sitio Radar kusog man gihapon ang pamaligya og ilegal nga drugas. Naa na sila dapit sa may bilyaran mag-estambay unya ang uban sa namaligya kay mga menor de edad pa. “
Brgy Yati, Liloan, Cebu
“Naproblema gyud kaming mga driver sa habal-habal ug ubang mga motorista tungod niining grabeng trapik sa eskina Bagong Dalan. Hapit kada gabii gyud ang trapik tungod nianang gitrabaho nga karsada nga gibiya-biyaan ra man sa contractor.”
Brgy Triumfo, Carmen , Cebu
“Amo lang ireklamo kining alad (tangkal) sa baboy sa Sitio Cambenia kay duol ra kaayo sa kabalayan unya baho pa gyud kaayo. Ang mga opisyal sa barangay wala’y gihimong aksyon.”
Brgy Damolog, Sogod, Cebu
“Wala na mi makasabot kay daghan na tinuod ang misurender nga drug pushers pero daghan pa gihapon ang namaligya diri. May nahibaw-an mi nga adunay tighatod diri og shabu, ug gikan kuno sa usa ka polis. “
Brgy Adlaon, Cebu City
“Kusog gyud kaayo ang pamaligya og shabu diri. Kanus-a pa man madakpan ang mga drug lord para mahunong na gyud ang pagkuyanap sa shabu sa among lugar.
* * *
Alang sa inyong mga reklamo text ang sa 09083006702
- Latest
