Seguridad

Samtang nagtan-aw sa television sulod sa barko nga akong gisakyan paingon sa lalawigan sa Bohol, akong nahibaw-an ang hugot nga seguridad nga gipatuman sa mga sakop sa Land Transportation Office (LTO) ug Land Transportation Franchising and Regulatory Board sa kamad-an ug ang Philippine Coast Guard sa kadagatan.

Sa kaulohan usa ka bus nga pasaheroan ang wala padagana sa mga sakop sa LTO kay buak ang windshield niini. Rason sa taga LTO nga peligro kun padaganon ang bus nga guba ang windshield tungod kay dili makakita ang driver kun adunay kusog nga uwan.

Walay nahimo ang tagdumala sa bus gawas sa paghulip og laing sakyanan aron mahatod sa ilang paingnan ang mga pasahero nga nakasakay na sa ilang bus nga wala tugoti nga makadagan.

Husto ang gihimo sa taga LTO kay una sa tanan, ang seguridad ug kaluwasan sa mga pasahero, mao gayud ang ipatigbabaw. Ang uban gud nga tagdumala sa mga sakyanan sa yuta ug kadagatan nga bisan dili na angayan nga padaganon ang ilang mga sakyanan, padaganon gihapon aron sila makasapi.

Adunay mga magpapatigayon sa transportasyon nga ang salapi lang ang gihunahuna ug gibutang sa alanganin ang kinabuhi sa ilang mga pasahero. Mao kini ang hinungdan ngano nga daghang trahedya sa kadagatan ug kadalanan ang nahitabo nga mikutlo na og liboan ka kinabuhi. Gipabayaan lang ang pagkamahinungdanon sa kinabuhi tungod sa salapi.

Sa matag biyahe, kanunay nga nakasandig sa driver ug sakyanan ang seguridad ug kinabuhi sa mga pasahero, may okasyon man o wala, may bakasyon man o wala ug may holiday man o wala. Busa ang LTO, LTFRB, Coast Guard ug uban pa nga ahensiya sa gobiyerno nga gitahasan sa pagbantay sa seguridad ug kaluwasan sa mga pasahero sa kanunay unta magbinantayon.

Dili lang kay motinuod sila paghimo sa ilang trabaho kun adunay okasyon, taas nga bakasyon o holiday kun dili sa tanan unta nga adlaw.