Kampanya batok kriminalidad

Mokugi na gyud ang mga polis ning P50 mil nga saad ni Mayor-elect Tomas Osmeña nga reward alang sa makapatay og kriminal ug gamay-gamay alang sa makapusil apan dili mamatay.

Siyempre, kuwartang malabo ang P50 mil. Maglumpayat ang mga polis sa pagbantay nga adunay manghitabong krimen sa usa ka lugar ug wala unya’y pupasaylo nga mopusil ug mopatay sa badlongon nga masakpan sa akto nga naghimo og krimen.

Gihangop sa pipila kining paagi ni Tomas pagsumpo sa kriminalidad. Bunga kini sa kapakyas sa atong mga awtoridad pagpatuman sa kahusay ug kalinaw.

Sa panahon ni Mayor Mike Rama, ang panglabni sa Colon, Carbon, ug bisan sa uptown area migara. Makapila ma-report sa mga radyo, mantalaan, telebisyon ug sa Facebook ang panulis sa PUJ (apil na kanang mangantahay nga mamugos pagpangayo sa mga pasahero), mga pagpanglabni ug mga panguot. Wala gyud kini hatagi og pagtagad ni Mike. Daghang biktima nga nahimong makaluluoy.

Hinuon, magpunay og sugo si Mike pagparonda sa balay ni Jaguar sa Duljo bisan ang tawo dugay ra nga miundang sa negosyo sa drugas.

Gani, ang kapolisan nga mitumaw’ng nagsuportahan sa mando ni Mike nga sigehan og harass ang lugar ni Jaguar, misulti ngadto sa media nga No. 2 druglord kini sa Kabisay-an. Gani na-banner kini sa The Freeman. Nasayop ang dila, kay kun nasayod sila nga No. 2 kini, nganong wala man gukda ang No. 1.

Kinsa man ang No. 1? Dili ba mao kanang gihinganlan og FS? Nganong dili man interesado si Mike nga ipagukod kining tawhana? Nganong ang No. 2 ra man gisigehan og harass sa mga polis?

Karon nga si President-elect Rodrigo Duterte na ang molingkod sa Malacañang ug numero uno nga buhaton niini mao ang pagpuhag sa ilegal nga drugas sulod sa tulo ngadto sa unom ka bulan, angayang mangunay si Mike paghingalan kinsa ang No. 1 nga druglord sa iyang panahon aron dili siya dudahan ni Digong nga siya’y nagpaluyo niini.

Kaniadto sa panahon ni Mike, apil ang mga sakop sa media nga mahadlok motuki sa ilang mga programa, komentaryo, balita o lindog kabahin sa kinabuhi sa mga druglord. Apan karon nga suportado ni Tomas ang kampanya batok sa drugas ug mismo si Digong maoy mogukod kanila, magpaabot kita nga mas daghan unyang parehas namo nga motuki kinsa kining mga tawhana.

Adunay druglord nga tua na sa Manila magtikawtikaw. Kining tawhana nanion og estudyante didto apan maayo gani kay wala modako ang kaso ug wala mabantayi sa kapolisan. Kining tawhana nga naila kaniadto dinhi nga “Negro” usa ka negosyante didto sa kauluhan, apan walay nasayod kun miundang na ba sa ilegal niya nga negosyo.

Hinuon, ang kampo ni Digong nangayo na og listahan sa mga druglord. Mapugos paghatag  ang PDEA kay nag-ayo sila og dili sila mokooperar. Apan daghan kanila nanglayas na sa nasud.