Ang naabot sa ilang pagsabot

Ato gyud tingaling masaypan ang managsuong sila si Santiago ug Juan mga anak ni Sebedeo nga mga taong segurista kaayo. Buot nilang magpuyo sa kinabuhing pinasidunggan bisan na gani sa katapusang mga adlaw. But in fairness ini nila sa kaulahian ilang napamatud-an ang ilang dakong gugma ngadto sa ilang magtutudlo. Si Santiago ang unang nahiagom sa dugoon nga kamatayon samtang si Juan ang nihalad sa iyang kaugalingon diha sa pagpangalagad ug pagsangyaw sa maayong balita. Tungod kay tawo, dunay limitasyon ang ilang panlantaw. Tungod kay tawo dunay sipyat ang ilang kinaiya ug dili hingpit ang ilang mga pangindahay ug mga gitinguha. Apan sa kadugayan sila nihamtong dili lang sa panuigon kondili sa espirituhanong aspeto usab.Mao nga diha sa atong kinabuhi usab, adunay mga higayon nga kita mamahimong mosukwahi sa atong gitinguha. Ang atong pagbati mahimong mosukwahi sa atong gihunahuna. Maingon nga ang atong pagkinabuhi mamahimong dakong lahi sa atong baruganan tungod sa mga panghitabo nga dili damhon. Apan luyo ning tanan, ang dios padayon  nga nihatag sa iyang dakong pagsalig kanato bisan pa man sa buhing kamatuoran nga kita mga tawong masalaypon. Ning atong pagsaulog sa World Mission Sunday angay natong hinumdoman nga ang pagsangyaw sa ebanghelyo ang kinahanglang magsugod gyud mismo sa atong kaugalingon bisan pa man sa ginagmay nga paagi ug bisan pa man kun mao lay naabot sa atong pagsabot.