Epektibong remedyo sa opaw

Isip usa ka normal nga tawo, dili usab kalikayan nga  makasinati kita ini'ng komon nga bation sa kinabuhi ang mga problema nga gitawag og 'mental stress'. Nga tungod usab niini, usa ni sa hinungdan sa pagpanglagas sa atong buhok. Normal usab ang 50 - 100 ka lugas sa buhok ang manglagas kada adlaw. Nga kun mograbe na ang gidaghanon, mao na na'y 'hairloss' o 'Alopecia'. Kaylagi wa nato sagopa nga masalbar kini, mao'ng miresulta na hinuon sa pagka-opaw.

Hinuon, kun may igo kang ikagasto aron makabaton ka'g balik nga may buhok ang ulo, wa'y problema kay duna na'y teknolohiya ini nga giserbisyo nga ginganla'g 'hair transplant' o 'permanent wigs', apan imo gyud kini mintinahon pag-ayo aron di mausik ang katuyoan mo sa pagbaton ini. Gawas aning paagiha aduna pa'y mga pagpatubo sa buhok pinaagi sa mga 'formulated chemicals' apan di sab kalikayan ang mga 'side effects' nga sagad maka-allergy.

Aduna'y lamas (natural remedy) nga gikompirmar nga luwas ug nag-una sa kaepektibo sa pagpatubo'g balik sa buhok, sa bagulbagol nga opaw na kaayo. Kini mao ang sibuyas Bombay, mapula man o puti. Ang uban wa kaayo mouso sa pagamit ini tungod sa kaisog sa baho nga lisud agwantahon. Ngano -  unsa bay birtud nga anaa ini nga makatabang man kini sa pagpatubo'g balik sa buhok?

Ang sibuyas Bombay aduna'y 'natural plant sulfur', nga ang duga nga ipatuhop sa bagulbagol, mopaugmad sa maayong sirkulasyon sa dugo sa ulo. Aron ikahatud ang mga sustansya sa tinudkan ini (skin pores). Moprodyus sab ni'g tisyo nga 'collagen' nga mao'y mopahimsog sa buhok. May panagang sab ni batok sa kaspa (anti-fungal/bacteria). Ipahid ang duga ini nga masahean ug paugha. Mas dugay mas maayo, unya pag-mild shampoo dayon banlawi'g tubig. Buhata ni 3ka beses sa semana ug obserbahe ang resulta sud sa 2-3ka bulan.