Buddhists midayeg ni Pope Francis

Wa kaayo kita mahibawo niini nga ang Taiwan-based nga Tzu Chi Foundation sa mga Buddhist mitabang pagpabarog pag-usab sa Sto. Niño Cathedral sa Palo, Leyte.

Migasto sila’g P35 milyones nga maoy nakapahuman sa mga major repairs sa cathedral.

Atong makita dinhi nga wala magtagad ang mga Buddhist sa relihiyon.

Unsa may nakaaghat kanila pagtabang sa alampoanan sa mga Katoliko didto sa Palo, Leyte nga bag-o lang giduaw ni Pope Francis?

Si Fr. Ben L. San Luis, SVD, sa iyang lindog sa Manila Bulletin, nagkanayon nga ang mga Buddhist ‘was moved by their admiration of Pope Francis.”

Sa ato pa, inspired ug midayeg sila sa Santo Papa, nga nakatandog kanila ug nakaaghat pagtunol sa ilang tabang.

Matud ni Alberto Li, ang chief executive officer sa foundation, P35 milyones ang ilang gibubo nga kantidad nga maoy nakatapus sa mga major repairs sa cathedral.

“Pope Francis is someone we really admire and respect. His humility and his love for the poor and his being simple is something that we really love about him.

This character of Pope Francis should be emulated by politicians and leaders of this country and other denominations around the world,” nagkanayon si Li.

Nangandoy si Li nga ang pagkayano ni Pope Francis ug ang tiunay niya’ng gugma sa mga kabus, sundon unta sa mga politiko sa atong nasud ug sa ubang denominations sa nagkalainlaing dapit sa kalibutan, Christians o non-Christians.

Manghinaut usab kita, nga sundon kini sa mga tinugyanan ug kadagkoan sa atong Simbahan, kay usahay ra ba, hilabihan sila ka luho, lahi ni Pope Francis nga duol kaayo sa katawhan.

Sila si Li ug laing 60 sa ilang sakop, mitambong sa Misa ni Pope Francis ug kapin sa 400 ka miyembro mi-volunteer isip human barricade subay sa rota sa motorcade ni Pope Francis gikan sa Tacloban paingon sa Palo. Mga Buddhist ni sila ha!

Sa ato pa, tininuod g’yud ang ilang pag-admire sa Santo Papa. “Pope Francis is not just a treasure of the Catholic Church, but also a treasure to mankind,” nagkanayon si Li.  Ug ang ilang pagdayeg sa Santo Papa, dili kay kutob lang sa pagpadayag sa maong pagdayeg, kun dili, ila kini’ng giubanan og aksiyon.

Kita, unsa man ning atong pagka-Katoliko? As an individual Catholic, unsa ug pila may atong natabang sa mga biktima ni Yolanda?