Mga pagkaon sa kagabhion

Adunay panultihon alang sa kahimsog nga matud pa, “Eat breakfast like a king, Eat lunch like a queen & Eat supper like a pauper.”Ang buot ipasabot, sa pamahaw daghan ta’g kaunon, sa paniudto kasarangan lang ug sa panihapon diyutay lang sama sa kinan-an sa makililimos nga nihit sa pagkaon. Angay sa gabii sayo manihapon aron ang lawas maandam sa maayong pagtulog.

Apan dinhi sa mga siyudad, nabalit-ad ang istelo sa pagkaon. Ang adlaw gihimong gabii. Diyutay ray kaunon sa pamahaw o way gikaon mohigop la’g kape, inig paniudto igo lang motimotimo ug sa gabii mamawe nga magtagbaw sa kabusog. Maong daghang kaso sa urom o atake tungod niini.

Ang mga eksperto adunay himsog nga pagkaon sa gabii. Kon mukaon niini, kinahanglan 2 ka oras sa di pa ikaw motultol sa higdaanan;

*Cottage cheese – ½ o 1 ka tasa lang, o paresan nimo og almond butter kay kini may ‘casein protein’ o amino acid nga ‘tryptophan’, pakalma sa tulog.

*Oatmeal– carbohydrates kini nga dunay ‘serotonin’, nga mopaus-os sa stress sa utok. Kun gusto ka sagoli’g skim milk ug mansanas.

*Peanuts (mani) o Peanut butter – daghan nig ‘niacin’ , aron pagbaton og daghan serotonin. Mas maayo ipahid sa biskutsong sandwich. Aylag palabi niini kay taas kini og kaloriya. Mamaayo sab ang pagtulog mo ini.

* Gatas nga init – inom og gatas aron dali makatulog. Aduna sad ni ‘Trytophan’ ug ‘Melatonin’, nga mokontrol sa maayong pagtulog.

*Grapes (ubas ) – ang bugtong prutas nga dasok sa Melatonin, usa ka sleep hormone, aron malinawon ang pagtulog mo sa gabii.

Ayaw lang gud pasobrahi

Ni John REY sAAVEDRA

Usahay ang atong pagkareklamador maghinobra ug palabian aron mopalami sa estorya.

Nagtuo ko nga mao kini ang nahitabo sa Vicente Sotto Memorial Medical Center diin usa ka iyaan ang mireklamo tungod kay matud pa, nahulog sa sawog sa delivery room ang bag-ong natawo nga anak sa iyang igsuon. Taym pa ra gud, unsa may sawog sa ospital?  Unsa may mahitabo sa bata nga bag-ong natawo kon maugsok ang humok pa kaayong ulo niini ngadto sa sawog nga konkreto?

Ang pamahayag sa VSMMC nagkanayon nga base sa pasiuna nilang imbestigasyon, ang nurse kusganong mihimakak nga nahulog ang bag-ong natawo nga bata ngadto sa sawog.

Sumala pa sa pamahayag niini, wala’y bun-og (trauma) o bisan unsang marka nga magmatuod nga nahulog kini sa sawog.

Nindot hinuon ang “approach” sa tambalanan niining maong insidente. Mihimo gilayon kini og imbestigasyon ug ang kawani sa maong tambalanan nga maoy sentro sa reklamo sa iyaan gipaubos sa imbestigasyon ug gihatagan og tulo ka adlaw sa pagtubag sa alegasyon.

Si Nonoy Mongaya, ang tigpamaba sa VSMMC, nagkanayon sa report sa The Freeman kagahapon nga nadawat nila ang reklamo human magpa-interbiyu ang mga complainant.

Gusto sa amahan sa bata nga mapaubos sa CT scan ug X-ray ang bata aron mahibaw-an kon wala ba gyu’y kadaut nga naangkon niini tungod sa matud nila pagkahulog sa bata ngadto sa sawog.

Apan si Dr. Joseph Al Alesna sa VSMMC nagkanayon nga adunay posibleng kadaut nga mahimo ngadto sa bata ang “radiation” gikan sa X-ray ug CT scan. Kon dili motuo ang mga ginikanan sa bata sa advise ni Dr. Alesna, mahimo man silang mokunsulta og laing doktor kon tinuod ba o dili ang gisulti ni Dr. Alesna. Kay kon magtuman sila sa ilang gusto, maghatag lang hinuon og kadaot ngadto sa bata nga wala unta maunsa.

Katungod sa mga ginikanan ang pagdepensa sa katungod sa ilang anak, ilabi kon kini bag-o pang natawo nga wala gyu’y ikasarang pagsukol sa milapas sa ilang katungod.

Apan maayo lang unta kon wala pasobrahi ang reklamo aron paglaraw og dautan batok sa ospital.

Wala kita masayod unsa gyu’y tinuod hangtod dili mogawas ang final result sa imbestigasyon sa tambalanan. Apan sa pagkakaron, kutob ra gyud kita sa pangindahay nga dili dautan ang plano sa mga reklamante.

Mag-ampo lang usab ko nga dili kini maparehas niadtong laing ginikanan kang kansang bata gibutangan og tape sa baba. Human matabangi sa ilang kawsa pinaagi sa media ug sa Commission on Human Rights, nagpa-settle ra gihapon sa mga tinugyanan niadtong pribadong tambalanan.

Kay kon mao kini ang tuyo, gikuyawan ko nga may daghan pa nga mag-drawing na lang og scenario aron makasapi.