Katigayonan sa inahan

Dear Atty. Divine,

Duna lang unta ko’y pangutana labot sa kabtangan sa akong nanay nga nasunod niya sa iyang mga ginikanan. Buhi pa ang among nanay, upat kami ka magsuon, karon nagplano ang among nanay sa pagbaligya niini apan supak unta kami nga mga anak kay usik nga maadto sa lain ang maong property. Ang akong pangutana attorney kun mahimo ba nga babagan namo’ng  mga anak ang pagbaligya ni nanay sa maong property? Unsa may maayo namo nga buhaton aron dili mahipunta sa lain ang maong kabtangan? - Francisca

Dear Francisca,

Kun sinunod sa imong nanay ang maong property sa iyang ginikanan makonsiderar kana nga exclusive property busa bisan kun patay na ang inyong tatay tungod kay dili man conjugal property ang maong kabtangan wa pa kamo’y katungod nga manghilabot niini pagkakaron samtang buhi pa ang inyong nanay. Kun nagtinguha ang inyong nanay sa pagbaligya sa maong property dili ‘sab kamo makababag kay ang inyong nanay isip tag-iya aduna siya’y katungod sa pagdesisyon kun iya kining ibaligya. Ang maayo ninyong buhaton aron dili maadto sa lain ang maong property mao ang pagtanyag sa inyong nanay nga kamo’ng mga igsuon ang mopalit niini. Wa ‘sab seguro’y rason nga mobalibad ang inyong nanay sa inyong tinguha. Hinaut nga akong natubag ang imong mga pangutana. Thanks and God Bless. - Atty. Divine

Kun ikaw adunay pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.