Scholarship program

Nakagradwar na sa ilang pagtoon ang una’ng batch sa mga Cebu City Scholars nga nagsugod pagtungha sa kolehiyo kaniadtong 2010.

Aduna hinuo’y pipila sa mga city scholars nga wala pa makahuman sa ilang mga kurso kadtong mikuha og engineering ug architecture courses. Nindot g’yud kaayo kini nga programa sa dakbayan sa Sugbo.

Akong angkunon nga kun dili pa tungod sa City Scholarship Program, maglisud g’yud ko pagpatungha sa akong duha ka anak sa kolehiyo tungod sa kadagko na sa tuition fees.

Tag P10 mil ra tuod ang mapahimuslan sa usa ka scholar kada semester apan daku na kini kaayo og ikatabang. Karong tuiga, miabot na og P480 milyones ang gipagahin ni Mayor Michael Rama sa scholars.

Angay’ng pasalamatan usab ang mga sakop sa Cebu City Council kay wala gayud nila giibanan bisan og usa ka sentimo ang giduso nga budget sa mayor alang sa scholarship program.

Apan labaw nako nga pasalamatan ug dili nako kalimtan nga programa kini ni kanhi Mayor Tomas Osmeña ang paghatag og scholarship sa mga anak sa taga dakbayan nga mogradwar sa public high school.

Husto g’yud kaayo ang gihimo ni Jhannel Flores, 19-anyos nga Cum Laude sa Cebu Normal University (CNU) sa kurso nga Bachelor of Science in Education, major in Mathematics.

Usa si Flores sa una’ng batch sa mga scholars dihang migradwar siya sa Apas National High School ug mitungha siya sa CNU. Miadto g’yud si Flores sa balay ni Tommy kagahapon uban sa iyang mga ginikanan.

Maayo unta og dili mausab ang baruganan ni Mayor Rama ug iya pa nga palambuon ang scholarship program sa dakbayan. Ang gikuyawan nako kay basin tungod sa pagkuwang sa koleksyon sa dakbayan, dili na niya tumanon ang lagda.

  Gitan-aw man gud nako ang paghatag og cash assistance sa mga senior citizens nga samtang giaprobahan sa City Council ang P720 milyones nga budget nga giduso ni Rama, sa ato pa ‘tag P12 mil kada usa, apan dili man ihatag ang gisaad nga kantidad.

Wala’y nahimo ang mga senior citizens gawas sa pagpanglingo-lingo. Tinuod, magtubo ang kantidad nga magasto sa dakbayan, apan duna man kini kinutoban.

Pananglit karon nga migradwar na sa ilang kurso ang kadaghanan sa unang batch sa mga scholars, naibanan na ang gidaghanon apan duna usab hinuo’y napuli nga mga bag-o nga migradwar sa high school.

Sa ato pa, kun pila ang maka-avail sa scholarship karong Hunyo, ingon niana na kanunay ang gidaghanon sa mga scholars. Awhag sa mga opisyal sa dakbayan, ipadayon nato ang scholarship program!