EDITORYAL - Nagpaabot ang mga senior sa cash assistance

Mahinamon  nga  nagpaabot  ang mga  senior citizens  ning  dakbayan  sa  nabahaw nilang  dawatonon  nga  mao  ang P2 mil  cash  assistance  gikan  sa kagamhanan  ning  dakbayan  sa Sugbo.

Apan  tungod  kay  tua pa  sa gawas  sa nasud  si Mayor Mike Rama, nagpabilin  kining  nag-ungot  sa panudlanan  sa  siyudad.

Tua kang  Mayor  Rama  ang  gahum  sa pagpanghatag  niini  ngadto  sa  mga  senior.

Bisan  bahaw  kini  apan  mapahiubsanong  gipaabot  sa  mga  senior  kay  hatag  ug  gasa  kini kanila  sa kagamhanan  sa siyudad.

Kining  P2 mil  nga  dawatonon  sa tanang  senior  sa unang higayon  niining  tuig  2014  maoy  salin  nga  bahin  sa P10 mil  nga  dawatonon nila  sa  tuig 2013.

Wa pa kasugdi  sa  kagamhanan  ang  paghatag  sa  unang  bahin  sa P12 mil  nga gisaad  nilang  dawatonon  sa  mga  senior  ning  tuiga, 2014.

Kini ra ba kunong  maong  kantidad, katunga  ray  cash,  apan  ang laing  katunga mga  grocery item kuno.

Daghan  ang  milalis  nga  mas  maayo  ang  cash  aron  sila  nay magbuot  kun  unsay  ilang  pamaliton  o  gastoan  sa  maong  salapi.

Apan  ang  uban  misugyot nga  mas  maayo  usab tuod  ang  grocery items  aron  mapuslan  gyud  sa ubang mga senior.

Kay  nasayran  nga  may pipila  sa mga senior nga isugal  ra  ang  madawat  nilang cash  gikan  sa kagamhanan.