Kahasol sa Kalagkalag

Carreta, Cebu City--Kadlawon pang dako sa bisperas sa Kalagkalag nga nanglimpiyo ang mga kawani sa 2GO Group Inc. sa mga nitso sa mga patay’ng lawas nga naugkat sa nalunod nilang barko, ang MV St. Thomas Aquinas 1, nga giingong gibanggaan sa MV Sulpicio Express Siete sa Lauis Ledge sa Talisay City niadtong Agosto 16 ning tuiga.

Lahi ang hulagway sa napasagdan nga mga lubong sa mga pasahero sa MV Princess of the Stars sa Sulpicio Lines nga karon ginganlan na og Philippine Span Asia Carrier Corp. nga nalunod sa kadagatan sa Romblon lima ka tuig nang nilabay. Way nagtikawtikaw. Gawas sa mga bata nga gisugo pagpamintal sa usa ka nitso.

* * *

Wa pay bisan usa sa mga tagtungod sa wa pa mailhi nga mga patay’ng lawas sa mga pasahero ug tripulante sa 2GO ang niduaw dinhi aron pagpanagkot og kandila. Matud sa mga kawani wa sila tugona sa management sa 2GO pagda og mga kandila aron pagsegurong madagkotan ang tanang nitso. Masaligon hinuon silang moduaw ang mga tagtungod tungod sa kabag-o sa trahedya.

Nangalisbo hinuong hugaw sa tawo dinhi. Kay nahimutang man sa suok sa menteryo mahimong wa nay nakabadlong sa mga nasaag dinhi di aron pagpangaliya alang sa mga biktima sa labing bag-ong katalagman sa dagat. Managsamang inutil ang 2GO ug PSACC pagkontrolar sa baho sa mga lubnganan sa ilang mga pasahero ug mga tripulante.

* * *

Alerto nang kapolisan sa sud ug gawas sa menteryo. Traffic enforcers sa Citom aktibo na sang nipatuman sa mga lagda sa trapiko, labi nang pagdili sa pagparada sa mga sakyanan duol sa mga ganghaan sa menteryo. Gisusi ang mga bagahe sa mga nanud sa menteryo ug gisakmit ang mga hinagiban, mga ilimnon ug ubang gidili nga mga butang.

Niangkon hinuong daan ang kapolisan ug traffic enforcers nga di nila makontrolar ang gidaghanon sa mga tawo nga moduaw sa mga lubong dinhi. Bugtong nila mahimo mao ang pagtino nga way masakitan sa tinuig nga baha sa maghuot nga mga mangalagkalag ning labing dakong menteryo sa dakbayan.

* * *

Nakita nakong kakulian dinhi nga posibleng mopasamot sa kayagaw sa katawhan mao ang way klarong agianan sa mga lubong nga nagbad-ay sa yuta. Wa kay laing mahimo gawas sa pagtamak sa mga lubong kay wa na may nahibilin nga luna nga kaagian. May mga naatlan namo nga napul-an na og kagis sa yuta nga nitabon sa mga lubong aron matultolan ang mga luna sa ilang nitaliwan nga mga minahal sa kinabuhi.

Laing suliran mao ang nagyungyong nga mga linya sa kuryente. Lisod nang daan nga likayan sa adlaw’ng dako unsa na kaha kun motikyop nang kangitngit ug mas maghuot nang menteryo. Apan gamay ra ning kahasol kun itandi sa mga Bol-anon nga wa nay mga lubong nga duawon kay gipapas sa pintas nga linog.

* * *

Email: [email protected]