Maayong silotan g’yud

Daghang mga badlongon nga drayber nga mangutana kanako unsay angay’ng buhaton aron gamay ra ang ilang mabayran sa nagtipun-og nila nga multahanan sa Traffic Violations Bureau (TVB) sa CITOM.

Motug-an lang g’yud ko ninyo nga dili ko ganahan nga motabang niining maong mga drayber. Kun nagtipun-og na ang ilang multahanan sa ato pa nga kadaghan na sila madakpi, abusado sila.

Kun madakpan gani, tagdon dayon pagbayad ang multahanan dili kay huwaton nga unya ra bayari kun mokiha na ang CITOM. Tarong man gud ko nga pagka drayber mao nga masuko ko sa mga abusado.

Gani mosurok g’yud ang akong dugo nga makakita og mga drayber nga abusado kaayo, kanang mga PUJ ug taksi drayber nga mokalit lang og padaplin unya mobalik na usab sa tunga sa karsada.

Ang drayber dili man gayud madakpan kun magtuman lang sa mga lagda nga gilatid sa balaud. Gawas tingali kun ang pag-angkon niya’g lisensya nakuha kay gibayran lang nga wala mag-agi’g seminar.

Ako gani nga suheto na’g gamay sa Transportation and Traffic Code, matag karon ug unya, mobasa pa man gani sa balaud, kamo pa kaha?

Dili gayud maayo nga moabuso kita. Ako gani nga deputized agent sa LTO kun mosakay ko’g motor, kanunay g’yud ko nga magsul-ob og crash helmet ug motuman sa balaud sa pagmaneho.

* * *

Gikontak nako si Vice Mayor Edgardo Labella ug gipahinumdoman sa iyang gisaad nga magbutang siya’g “Citizen’s Hour” atul sa ilang sesyon sa City Council.

Pinaagi sa Citizens Hour nga gihimo sa ubang kanasuran, kahatagan og higayon ang mga yano nga sibilyan, sama kanako, nga makapadangat sa ilang huna-huna ug sugyot ngadto sa konseho.

Duna man gud ko’y sugyot unta nga angay’ng adunay ordinansa nga ang mga mag-drive og motor dinhi sa dakbayan kinahanglang i-kwentas g’yud ang ilang driver’s license.

Usa kini sa paagi aron mahibaw-an kinsa kadtong mga nag-drive nga walay lisensya. Daghan kaayo karon sa mga nagmaneho og sakyanan, ilabi na mga drayber  og “habal-habal” nga motorsiklo nga walay lisensya.

Diri lang sa Barangay Apas ug Busay, daghan kaayo nga nag-drive og habal-habal nga walay lisensya. Dili man ko supak nga sila manginabuhi pagka drayber sa habal-habal, apan siyaro, bisan lisensya dili mokuha?

Mao kana nga kun adunay operation, dili g’yud ko mosugot nga pasayloon lang kining maong mga tawo bisan pa’g mohilak pa’g dugo. Kun maaksidente kining maong mga motor nga walay lisensya ang drayber, mobayad ba ang insurance?

Mao kini nga kamong mga konsehal diha, buhati ninyo kini’g ordinansa.