Navforcen, way raro!

Dili lang kay kutob lang sa pag-ila sa mga opisyal nga responsable sa pagtago sa mga hinabang nga gipadala gikan sa mga nagkadaiyang probinsiya aron ipang-apod-apod unta ngadto sa mga biktima sa linog sa mga lungsod sa Bohol.

Angayan gyud silang silotan!

Mao kini ang nakadaot dinhi sa Pilipinas, daghan kaayo ang mapahimuslanon sa kahigayonan. Mohari na gani ang kahakog sa mga politiko, dili na sila makahunahuna sa ilang mga konstituente nga nagkalisod.

Apan hain man si Interior Secretary Mar Roxas?

Utro ra ba kini siyang nagpa-pogi points lang sa iyang pag-adto-adto sa Bohol.

Misaad si Roxas silotan ang mga opisyal nga nasakpan nga nag-hoard og mga sinakong relief goods nga gikan sa mga nagkadaiyang donors.

Atong tan-awon kun aduna ba gyud siya’y mahimo batok niining mga opisyal nga nakahunahuna na usab og dautan nga nagsud-ong sa kadaghan sa mga relief goods nga nag-abot-abot alang sa Bohol.

Kami sa The Freeman kagahapon nagka-problema tungod kay ang relief goods sa The Freeman Foundation wala mabiyahe paingon sa Bohol tungod kay mibalibad ang Naval Forces Central Philippines (Navforcen) pagkarga niini sa ilang mga Navy boats.

Ang mga tagdumala sa The Freeman Foundation, pinanguluhan sa among general manager nga si Sir Bhoi Mendoza, nagkarakara intawon sa pagpangita og pamaagi aron lang makarga ang mga relief goods.

Naunsa man kining Navforcen, wala may klaro. Wala may problema kun balibaran ta, pero kanang sa katapusang gutlo na, hinanggaw na pud na. Militar man unta, pero mitukar ang pagka-walay klaro.

Nahinumdom lang usab hinuon ko sa gisulti sa akong amiga nga diver human niadtong trahedya sa Lawis Ledge human magkabangga ang duha ka barko – MV St. Thomas Aquinas ug MV Sulpicio Express Siete – imbes motabang sa search and rescue ug sa paglimpyo sa oil spill, igo ra gyud silang motunga sa nalunoran dayon mopakodak, ini’g human maglumba og panibat.

Bastos kining gihimo sa Navforcen. Dako kaayo ang kadaot nga ilang nahimo dili sa The Freeman Foundation, kun dili sa mga biktima sa linog didto sa Bohol nga mao unta’y tuyo nga matagaan sa mga ikargang relief goods.

Hahay, gobiyerno gyud!