Asa na ang kwarta?

Nabinlan pa diay og P105.3 milyones ang calamity budget sa dakbayan sa Sugbo kaniadtong miaging tuig, apan hain na kaha ang maong salapi? Ang pangutana kun anaa pa kaha gihapon kini hangtud karon?

Dunay lagda nga gilatid sa Republic Act 10121, Section 21, nga kadtong kantidad nga wala mahurot paggasto gikan sa calamity budget dili kini ibalik sa General Fund, adto kini ibutang sa special trust fund.

Ang mao nga special trust fund pagatawgon og Local Disaster Risk Reduction and Management Fund (LDRRMF) nga ang tumong niini nga mapundo ang kwarta aron adunay magasto kun moabot ang panginahanglan.

Nabantayan man gud sa Commission on Audit (COA) nga ang administrasyon ni Mayor Michael Rama wala mopatuman sa mao nga balaud nga namugna niadtong 2010 atul sa pagdaug niya nga mayor.        

Ang balaud nagkanayon “Unexpended LDRRMF shall accrue to a special trust fund solely for the purpose of supporting disaster risk reduction and management activities of the LDRRMC within the next five years.”

Sa ato pa klaro kaayo nga ang maong salapi tipigan g’yud. Dili ba nindot kaayo kay kun daku og subra ang calamity budget matag tuig, matigum kini og magamit sa ubang panginahanglan.

Apan ang pangutana, pila man ang calamity budget matag tuig? Ang tubag mao nga katumbas kini sa kantidad nga dili moubos sa singko porsyento sa budget sa usa ka local government unit.

Ikaduhang pangutana. Unsay gastohan sa calamity budget? Ang tubag mao kini. Ang 70 porsyento gamiton alang sa “pre-disaster and post disaster expenses” unya ang laing 30 porsyento alang sa “quick response.”

Gikuyawan ang taga COA kay pastilan, nagnihit ra ba karon ang kwarta sa administrasyon ni Mayor Rama, basin og magamit unya ang maong kantidad sa laing gastohanan.

Apan gipahibalo ko ni City Treasurer Emma Villarete nga nagsugod na sila pag-transfer sa wala magamit nga calamity budget gikan sa General Fund ngadto na sa special fund. Maayo kun mao.

Kinahanglan g’yud nga si Mayor Rama, isip usa ka abogado, motuman gayud sa balaud aron nga dili siya masubay sa hiwi nga dalan.

Uy, nakadungog ko nga may itudlo diay kuno si Mayor Rama nga bag-ong hepe sa Local Disaster Risk Reduction Management Office kay wala kaayo makontento sa serbisyo ni Alvin Santillana.

Ambot og tinuod ba nga ang itudlo ni Rama mao ang usa sa iyang mga “propagandists” kon mga announcers sa programa niya sa radyo ug sa kampanya sa miaging eleksyon.

He! He! He! Na hala gud, ayaw ninyo kwestyona ang maong pagtudlo ni Rama kang Semion “Sim” Romarate kay katungod man sa mayor ang pagpili kinsa ang iyang masaligan.