Taga Bato murag di sibilisado?

Ang  tuyo  sa kagamhanan  sa paghinlo  sa nasunogang  kugar  sa sitio  Bato, barangay  Ermita ning  dakbayan  sa Sugbo mao  nga  ikapahiluna  nga  hapsay  ang  tanang  apektado  nga  pamilya  sa maong  sunog.

Dili  tungod  nga  duol  na  ang  eleksyon  mohimo  og  mga  butang  binuang  si Mayor Michael  Rama  aron lamang  madaot  ang  iyang personalidad  ug labaw  sa tanan  ang  iyang  kandidatora.

Isip  mayor may  eleksyon  man o  wa, di  kini  magmika  sa  mga  butang  angayan  nga  hatagan  og  diha-diha  nga lakang.

Di baya  malalim  palandungon  ang  kahimtang sa  mga nasunogan  nga  mopuyo  sa wala  hiandi  nilang  lugar, ug labaw  sa tanan  ang  hilabihan  kahasol  sa ilang  kahimtang.

Ang  tawo  nga  di kaantigo  mopailob  ug  moangkon   sa kamatuoran  nga  nasugamak  siya  sa maot nga  kapalaran  nga maisip  nga  usa  ka dakong  pagsulay  sa iyang  kinabuhi,  maglisud  sa pag-adjust  nga  mahimong  makapaputong  kaniya  hangtud  nga  mosangpot  sa paghikog.

Usa  baya  kini  sa mga  butang  nga  gihunahuna  sa mayor, busa naningkamot  kini  nga  mahibalik dayon  ang  normal  nga pagkabutang  ug  panginabuhi  sa  mga  naapektohan  sa maong  sunog. Apan  makapasubo  kay  ang  iyang  mga kaatbang  sa politika  giingong  mao  kunoy  mimandar  sa  mga  taga  Bato  nga  ipalawgaw ang clearing  operation  nga  gipahigayon  sa city hall.

Gipangguba  ang  mga  kahimanan  sa kagamhanan ug  ang  maong  lugar  nahisama  sa mga salida  sa sine  nga  lugar  sa  mga  tawong  barombado, kuwang  sa edukasyon  ug  way  hustong  mga  lider  nga nag-atiman ug  nagdominar  aron ang  mga yabag  og  hunahuna  matanos.

Sa panahon  karon  nga  nia  na  sa kabag-ohan  ang  tanan  mas maayo baya  nga  likayan  na  ang  hunahuna  sama  sa  mga  tawong  di  sibilisado  nga  kutob  sa makita  niining  kahimanan  nga  moderno  sama  sa  mga heavy  equipment  panggub-on  sa ilang  pagtuo  nga  mogusbat  sa ilang  mga  kabtangan  ug  mohabhab  kanila  ug  mopatay  kanilang  tanan.

Mga  kinaiya  kini  sa  mga  tawong  layo  sa katilingban  ug  ang  ilang  palibot  pulos  kalasangan  nga wa  makakita  og  mga  binag-o  nga  kahimanan  nga  gipanggama  alang sa  kalambuan  sa urban  o  mga kapatagang  lugar.

Ang  sitio  Bato, barangay  Ermita  nia  sa kinapusoran  sa siyudad  sa Sugbo  ug  lisud  kaayong  tuohan  nga  ang  mga nagpuyo  sa maong  lugar susama  gihapon  sa  mga  tawong  ikogan,  o  kaha  mga  nanagbahag  pa  og  panit  sa kahoy  gumikan  kay  halayo  sa sibilisasyon  nga  nakabaton na  og  hustong  edukasyon  sa eskuylahan.

Apan  nganong  nakahimo  sila  sa pagguba  sa mga  kahimanan  sa kagamhanan aron  mahinloan  ang  ilang  lugar  nga  napuno  sa abo  sa napulbos  sa kayo  nilang  mga  panimalay.

Nganong  supak  sila  sa gilusad  sa kagamhanan   nga lakang  aron  unta  mahinlo  ang  maong  lugar, ikapatuman  ang   reblocking  aron maila na  ang  lugar  nga  bakantehon  aron  himoong  karsada  nga kaagian  sa mga trak  sa bombero  kun may sunog  nga mahitabo.

Kun mao  kini  ilang  gikagul-an  nga  may  uban  kanila  nga  ma-dislocate na  o  di  na makapuyo  sa dapit  nga  himoon na  nga  karsada, di baya  kuwang  og  pangisip  ang  mayor  nga  di  sila atimanon. Anaa  na  sa plano  sa mayor  ang  kabutangan  sa  mga  pamilya  sa higayon  nga  ang  gipuy-an  niini nga  naugdaw  sa sunog  matudlo  nga  agianan  o  karsada  sa  higayon  nga  moplastar  na  ang  reblocking.

Busa  kun  may hustong  mga  lider  o opisyal  sa barangay  ang maong  lugar, nganong di man  ninyo  pasabton  ang  inyong  mga  konstituwente bahin  niining  clearing operation  ug  reblocking  nga ipatuman  sa city  hall  sa maong  lugar  aron  dili na  nila  hilabtan  ang  mga  kahimanan  nga  gamiton  sa paghinlo  diha?