Unsaon pagbahin sa yuta nga di na muagi sa korte?

Adunay duha ka paagi sa pagbahin sa usa ka property nga inyong nasunod sa inyong mga ginikanan, usa niini mao ang pagbahin pinaagi sa Korte samtang ang ikaduhang paagi mao kining gitawag og Extra-judicial Partition nga diin ang mga heirs maoy magsabot unsaon sa pagbahin ang yuta kun ang namatay way gibilin nga utang ug ang mga anak anaa na sa legal age ug kun ugaling  adunay minor de edad narepresentahan kini sa iyang guardian. Kining pangutana labot sa pagbahin sa kabilin sa ginikanan maoy atong tuki-on karon.

* * *

Dear Atty. Divine,

Aduna lang unta koy pangutana may kalabutan sa yuta nga among na-inherit sa among mga ginikanan.Namatay na ang among mga parents five years ago ug hangtud karon wa pa mabalhin sa among pangan ang ilang yuta. Nagkasabot mi sa akong upat ka magsuon nga amo na kining bahinon ug ibalhin sa among mga pangan ang maong yuta. Tax Declaration ra ang imong gikuptan niini ug ang akong pangutana  unsa may among buhaton aron sa pagbahin sa maong property? Plano sab nako nga patituluhan ang akong bahin ug share, asa man ko mudangop nga opisina sa gobiyerno aron sa pagpatitulo sa akong bahin? Hinaut nga imong matubag ang akong pangutana. — Lina

* * *

Dear Lina,

Kun inyong bahinon ang maong property nga di na ipaagi sa Korte, ang inyong buhaton mao ang pag-execute og Extra-judicial Partition nga diin pagapirmahan sa tanang magsuon. Kining maong dokumento maoy inyong ipresentar ngadto sa Assessor’s Office aron mabalhin ang pangan sa maong yuta ngadto kaninyo nga mga heirs o mga sumusunod. Apan sa dili pa ni mabalhin kaninyo, kinahanglan nga mobayad una kamo og Estate Tax ngadto sa Bureau of Internal Revenue. Aduna sab kini requirement nga Publication ug uban pang rekisitos una kini mabalhin sa inyong pangan busa mas maayo nga inyong pangayoan sa listahan sa requirements ang Assessor’s Office ug Register of Deeds alang sa mga yuta nga titulado. Kon mo-apply sab ka og titulo sa imong share, muadto ka sa Community Environment and Natural Resources Office kon CENRO  sa lugar diin  nahimutang ang maong yuta ug mangayo ka  sa mga rekisitos alang sa pagpatitulo. Usa sa  mga requirements kun ikaw mo-apply og titulo  mao ang survey nga aprobado sa Bureau of Lands. Gawas niana, aduna pay laing mga requirements ug mas maayo nga mangayo ka daan sa listahan ngadto sa Cenro. Hinaut nga akong natubag ang imong pangutana. Daghang Salamat and God Bless.— Atty. Divine

Alang sa inyong pangutana, ipadala lang sa Legal Corner sa Banat News or email sa [email protected]