Moepekto ba kaha sa mga batan-on ang pagka-santos ni Pedro Calungsod?

Mga ala 7 sa sayong gabii, sa usa ka imnanan, nagpunsisok ang mga estudyante, lalake ug babaye … naka-uniporme pa, sa ato pa, either gikan pa sa eskwelahan or nangabsent. Nag-unsa man?

Lakip ang mga babaye, nag-inom, nagsigarilyo, nag-text, nagkinataw-anay, naghudyaka …  saba kaayo!

 Mid-morning, mga alas 9:30 kadto, tulo ka batan-ong babaye (mga gwapa ra ba  – hinungdan nga na-attracted ko), ug rich-looking, nag-inom, ang isug pa gyud nga brand sa beer, sulod sa usa ka gamay’ng convenient store.  Unsa may anaa sa mga police blotter? Mga batan-on nag-drugs, nang-hold up, namabdos, nag-shoplifting, nag-snatching .. unsa pa nang ubang matang sa krimen nga dili kita maka-imagine nga buhaton sa mga batan-on. Sa unang mga panahon, makasugat tag tiguwang sa gabii, mo-good evening gyud ta.

“Bi-i Noy, Bi-i Nang.” Karon … unsa man? Unya, mo-amen gyud ta sa atong katigulangan. Karon, unsa man? Kinaraan na kini. Obsolete na.

Gawas pa, nganong mo-amen man ta, nga wala may amen-amen sa America? Ug alang sa ato karong mga batan-on, ang mga Kano’ may ilang gihimong idolo.

Mao kini karon ang atong mga batan-on – gawas kaha sa mga maayo nga maayong pagka-matuto sa ilang mga ginikanan.

Hinoon, gamay ra ni tingali sila. In fairness, daghan pa sa ato karong mga batan-on ang nagpabiling buotan.

Apan, generally, makapangutana kita kun kining pagka-Santos ni Pedro Calungsod, aduna bay epekto ngadto karon sa mga moderno natong mga batan-on. Giisip nga Patron sa Filipino Youth, maka-influence ba kaha si San Pedro Calungsod sa atong mga batan-on, nga sa iyang pagtahan sa iyang kinabuhi, mga 18 pa ang iyang panuigon?

Sa ato pa, teenager pa. Mahimo ba kaha kini karon sa atong mga teenager? Niadtong higayona, mahimo baya nga mo-eskapo si Pedro, kay duha ra man to ka tawo ang miatake kanila. Mahimo nga iyang biyaan ang langyaw’ng misyonaryo, si Padre Diego San Vitores.

Apan, wala kini niya buhata, tungod kay hugot ang iyang Pagtoo. Sa iyang libro, si Msgr. Ildebrando Jesus Aliño Leyson, nagkanayon: “Pedro Calungsod suffered a violent death. Yet, notwithstanding such an acute pain and horror, he never renounced his Faith, never uttered a word of resentment nor a gesture of vengeance.”

Di kinahanglan nga magpakamatay gyud ta. Apan, sa atong mga binuhatan , sa pagpuyo subay sa kabubot-on sa Ginoo … ato pa, likayan ang corruption, atong ikapakita ang kahugot sa atong Pagtoo  ug ang kamatinud-anon sa atong pagka-Kristohanon ug pagka-Katoliko. 

Hagit kini kanatong tanan, labina sa Filipino Youth!