Ang donor

Sa matag saulogon sa parokya ni San Guillermo ang kapistahan, dili gyud saypon ni Madam Dives ang paglingkod sa mga nag-unang mga lingkoranan aron mosimba. Espoko mo na nga siya gyuy main sponsor matag misa. Natural lamang nga ang maayo og pinasidunggang dapit ang iyang lingkoran aron mas dali ra ang pagpasalamat kaniya sa ilang kura. Dugang pa, isul-ob gyud niya tawon por lo menos ang iyang mga naggilak-gilak nga mga alahas yawat na lang mapamista ang iyang mga latest collections.

Tuod man, samtang gipadayon ang Misa Pontifical, nakit-an ni Madam Dives ang usa ka yanong tiguwang nga yano apan mapahiyomong naminaw sa wali sa Obispo. Daw sa moulbo na hapit ang kaspa sa donya sa dihang iyang nakita ang maong tiguwang nga nilingkod sa iyang pwesto. Hinuon, mahimo pa mang malingkoran ang tupad niining lingkoranan, apan gusto lang gyud siyang molingkod didto. Sa tingog nga hinay apan aroganteng tingog iyang giduol ang tiguwang og giingnan: "Iya, nganong nilingkod ka man sa lingkoranan nga dili angay nimo. Wala ka ba kahibawo iya, nga ako ang sponsor karon og maoy modapit sa Obispo ngadto sa among balay?, mao nga balhin didto sa luyo!"

Apan ang tiguwang kalmado og puno sa pahiyom nga mitubag: "Pasayloa inday, nalingaw lang kong naminaw sa akong anak."

"Kinsang anaka aber?" kantalitang sukna ni Madam Dives.

"Ang Obispo nga karon nagwali ning maong Misa." PAMALANDONG

Ayaw'g hukmi ang libro sa iyang hapin. Ang tinuod nga kadungganan og ang pag-angkon sa tinuoray nga pagdayeg dili makab-ot pinaagi sa pagpataas og pagbaton sa naghinobrang tinguha nga daygon sa kadaghanan. Hinunoa, diha sa pagpuyo sa kinabuhing yano. Kay diha sa kayano, anaa ang kapuno.