Sunsport Basketball mopahigayon og training camps karong Hunyo

CEBU, Philippines — Luyo sa hugot nilang tinguha nga makatabang pagbaid sa abilidad sa mga batan-ong basketbolista, ang Sunsport Basketball miplastada og duha ka training camps sa managlahing binyu sa dakbayan sa Sugbo karong Hunyo.

Ubos sa superbisyon ni coach Jojo Romarate-Teves, ang tulo ka semanang clinic dungan nga mosikad karong Hunyo 3 didto sa Sacred Heart Center Sports Club sa may dalan D. Jakosalem ug sa Guadalupe Sports Complex sa Barangay Guadalupe.

Ang tulo ka semanang hinashasay abli sa mga players (babaye ug lalaki) nga nag-edad og siyete ngadto sa 19 anyos nga gustong makat-on sa ensaktong paagi pagduwa og basketbol ingon man palamboon ang ilang talento.

Ipahigayon matag Lunes ngadto sa Biyernes hangtud sa Hunyo 21, ang training sessions gitakda gikan sa alas-9 ngadto sa alas-11 sa buntag sa Sacred Heart ug gikan sa alas-2 ngadto sa alas-4 sa hapon sa Guadalupe.

Ang entry fee nagkantidad og P2,000 apil na niini ang libreng bola ug jersey.

Niadtong gusto moapil, adunay sayong rehistrasyon karong Mayo 30 ngadto sa Hunyo 1.

Alang sa dugang detalye, mahimong mokontak ni coach Jojo (0928-8295489) sa sa opisina sa Sunsport (345-1015).