Mga proyekto alang sa kalamboan sa probinsiya gustong ipatuman ni Garcia

CEBU, Philippines — Si Gobernador Gwendolyn Garcia sa Probinsiya sa Sugbo kinsa subling magpapili sa umaabot nga eleksiyon sa Mayo 12, 2025 nagkanayon nga wala siya mausab sukad sa unang adlaw nga nagsugod siya isip gobernador niadtong tuig 2004.

Si Garcia naila isip usa ka lider nga adunay iron-fist nga estilo diin atol sa

sa Know Your Candidate nga online program sa The Freeman (igsuong publication sa Banat News) nagkanayon nga ang iyang kinabuhi isip lider usa ka “bukas nga libro” ug ang mga Sugboanon na ang mohukom kaniya.

“You’ve watched me, you know my life wala ko’y gitago. More importantly, wa ko’y gilimod ug wa sad ko mamakak. My life is an open book from the very beginning”, ni Garcia pa.

Gipadayag ni Garcia nga dili siya usa ka tipikal nga politiko diin nakapakurat siya sa kadaghanan gumikan sa iyang abilidad diin aduna siya’y prinsipyo nga gibarugan..

“Ang politiko never says no, but I am who I am”, ni Garcia pa. Gipadayag ni Garcia nga ang iyang kasinatian sa pribadong sektor isip usa ka negosyante ang nagtudlokaniya nga walay usa ka butang nga molungtad kong kini nag-agad lang sa mga saad nga dili matuman.

Isip unang babaye nga gobernador sa Sugbo iyang gipadayag nga gitan-aw niya ang gobiyerno isip usa ka negosyo nga nagkinahanglan og efficient nga operasyon alang sa kalidad nga serbisyo ngadto sa mga Sugboanon.

Gipadayag ni Garcia nga kong hatagan pa siya og laing termino gusto niya nga matukod ang bag-ong Kapitolyo sa Lungsod sa Balamban.

Gipasabot ni Garcia nga ang kasamtangang Kapitolyo nahimutang sa Dakbayan sa Sugbo diin ang mga oportunidad ug pagpamuhonan nagpabilin nga nakasentro sa usa lang ka lugar.

“We should give opportunity to the real constituents of the province”, ni Garcia pa. Ang pagbutang sa bag-ong Kapitolyo sa Balamban perpekto tungod kay kini

anaa sa sentro sa amihanan ug habagatan nga bahin sa Sugbo.

“That is something that I hope we will be able to at least establish—the transfer of the seat of government to the central western part of the island of Cebu, the Municipality of Balamban”, padayag ni Garcia.

Gawas pa sa bag-ong Kapitolyo buot usab ni Garcia nga magtukod og usa ka departamento sa mga panginabuhian nga pang-ekonomiya (Department of Economic Enterprises) nga magtutok sa pagdumala sa mga proyektong Build-Transfer-Operate ug uban pang public-private partnerships (PPP).

Apil sa iyang gipasiugda ang operasyon sa dialysis units sa mga probinsiyal nga ospital, ang north ug south bus terminal, ang umaabot nga 150-megawatt solar power plant sa Daanbantayan, ug uban pa.

Gusto usab ni Garcia nga masugdan ang usa ka level 3 water system sa Lungsod sa Moalboal nga makatabang sa 8,000 ka panimalay pinaagi sa malungtarong suplay sa tubig.

Gawas niini daghang proyekto alang sa kalamboan sa Probinsiya sa Sugbo ang buot pa nga ipatuman ni Garcia. (BANAT NEWS)