DA tun-an ang regulasyon pagbiyahe sa mga hayop

CEBU, Philippines — Ang Department of Agriculture (DA) naghimo og komprehensibong pagrepaso sa mga regulasyon sa transportasyon sa kahayupan, ilabi na sa mga manok ug baboy, aron matubag ang nagpadayong mga hagit sa suplay. Segun sa press release sa DA, si Agriculture Secretary Francisco P. Tiu Laurel Jr. miingon nga ang pagrepaso sa mga regulasyon ipahigayon sa konsultasyon sa mga grupo sa industriya, partikular na sa Philippine Chamber of Agriculture and Food Inc.

Ang DA Administrative Order No. 5 (2019) naglatid og hugot nga mga giya para sa lokal nga pagdala lakip na ang mga estrikto nga mga timeline para sa pagkuha og transport permit ug ubang mga requirements para sa pipila ka mga hayop ug produkto.

Gisusi usab sa Bureau of Animal Industry (BAI) ang DA Administrative Circular No. 2, Series of 2022, nga nag-usab sa National Zoning and Movement Plan aron makontrol ang African Swine Fever (ASF), nga dakog epekto sa industriya sa baboy sukad sa outbreak niini kaniadtong 2019.

Sa pinakaulahing update, sa pakigtambayayong sa Food and Drug Administration, ang Department of Agriculture (DA) nagtrabaho aron komersyal nga magamit sa Pilipinas ang mga bakuna kontra African Swine Fever (ASF).

“We aim to streamline these processes and update safety measures to ensure stable supply and reasonable prices for pork, poultry, and other products, while safeguarding both public health and the livestock industry,” matud ni Laurel.

Gikonsiderar usab sa departamento ang usa ka multi-billion-peso nga pamuhunan aron mapaayo ang mga pasilidad sa quarantine, mapausbaw ang mga kapabilidad sa pagmonitor ug inspeksyon, ug magtukod og mga rehiyonal nga laboratoryo.  MEL BANAT NEWS