Pag-ayo sa karsada sa Brgy Dumlog Dalion

CEBU, Philippines — Gipaninguha sa konseho sa Dakbayan sa Talisay nga makagahin og pundo alang sa pag ayo sa karsada sa sitio Litmon, Barangay Dumlog.

Ang mao nga karsada usa lang sa mga naguba atol sa kakusog ug kadagko sa bawod nga hinungaw sa bagyong Kristine niadtong miaging buwan.

Si konsehal Rodi Cabigas, chairman sa committee on infrastructure nagkanayon nga nangita siya og pundo ug posible nga mopapasar og supplemental budget alang niini.

Matud pa niya nga kinahanglan kini nga mapaspasan tungod kay daghan ang moagi sa dapit.

Una niini, si Talisay City mayor Gerald Anthony “Samsam” Gullas nipasusi niini sa taga city engineering office aron masiguro ang kaluwasan sa mga tawo nga moagi sa lugar.

Ang short term nga pagsulbad sa problema mao ang ilang gihimo nga pag abuno og yuta sa lugar apan ang long term solution mao nga kinahanglan gyud nga sementohon kini aron mabalik ang kalig-on sa agi-anan. Gitinguha ni Cabigas nga sa dili pa matapos kining tuiga ilang masugdan ang pagtrabaho sa dapit.  MEL BANAT NEWS