Awto vs Prime Mover, duha patay

CEBU, Philippines — Duha ang patay sa nahitabong sa panagbangga sa usa ka prime mover truck ug Toyota Wigo diha sa boundary sa Barangay Tajao, Lungsod sa Pinamungajan, kagahapon sa kaadlawon, Oktubre 12, 2024, Sabado.

Ang mga nakalas mao ang driver sa Toyota Wigo nga si Jan Raydel Booc, 20, ug kaubang pasahero nga si Stephen Saturnino, 18, samtang angol ang laing duha ka mga sakay niini.

Samtang gikustodiya sa kapulisan sa Lungsod sa Pinamungajan ang driver sa trak nga si Diomar Caballero Bugna, 39, taga Toledo City.

Sigon ni Police Major Gilfred Baroman, hepe sa Pinamungajan Police Station ang Toyota Wigo gikan Toledo City ug padulong unta sa Lungsod sa Aloguinsan.  Ang Prime Mover Truck gikan og Lungsod sa Pinamungajan paingon kini sa Dakbayan sa Sugbo.

Apan pag-abot sa Tajao sa may utlanan sa Toledo nagbangga ang trak ug awto.  Makita matud pa sa video nga kusog ang dagan sa awto ug sigon pa sa drayber sa trak ga zigzag ang dagan sa sakyanan ug nisuway paglihay ang driver truck.

 Sa kakusog sa  pagbangga nadugmok matud pa ang sakyanan.  Dead on the spot ang driver sa awto ug maoy katapusang nakuha kay napiit kini.

Gani sa wala pa nahitabo ang disgrasya giingong nakatapsing sab sa awto ang tent nga gigamit sa vigil may Cabitoonan, Toledo City.  "Naigo sad daw natapsingan ani nila before sila na disgrasya," ni Baroman pa.

Gipasabot ni Baroman nga ang trak naa ra sa iyang lane atol sa pagpabangga.--  IBM BANAT NEWS