800 ka miyembro sa One Cebu nagtigom

CEBU, Philippines — Niabot ngadto sa 800 ka miyembro sa One Cebu ang nagtigom kagahapon, Septiyembre 30, alang sa convention niini sa dili pa ang unang adlaw sa pagduso sa  certificate of candidacy karong adlawa alang sa Mayo 2025 midterm elections.

Atol sa maong panagtigom, ang One Cebu gipangulohan ni Gobernador Gwendolyn Garcia nipirma og covenant agreement o kasabotan aron pagsilyo sa hiniusang pwersa pag-promote sa ilang paglansar alang sa umaabot nga eleksiyon.

Ang One Cebu pinaagi ni Garcia, president sa partido nipirma sa maong kasabotan uban sa nagkadaiyang partido sa Sugbo sama sa Kugi Uswag Sugbo (KUSUG) Party nga girepresentahan ni Acting Cebu City Mayor Raymond Alvin Garcia; Alayon-Nacionalista (NP) Party pinaagi sa presidente niini nga si Talisay City Mayor Gerald Anthony “Samsam” Gullas, Jr.; ug KAABAG Party pinaagi sa presidente niini nga si Lapu-Lapu City Mayor Junard “Ahong” Chan.

Sa maong kasabotan, ang mga nahisgotan nga partido nagkauyon nga parehong mag-ambitay sa susamang katuyoan sa politika alang sa kaayohan sa Sugbo ug mohatag og bili sa panaghiusa sa “geopolitical landscape” sa Sugbo alang sa 2025 election.

Si Garcia pormal usab nga gipili nga maoy bearer sa One Cebu diin subli kining magpapili sa posisyon alang sa iyang ikatulong termino.

Si Garcia, sa iyang mensahe nisubli sa kaagi sa partido gikan sa nagkabuak-buak nga panaghiusa ug karon nabalik na nga lig-on.

Si Garcia nasayod nga adunay ubang mga lungsod ug siyudad nga parehong nitapon sa One Cebu apan sa ilang tagsa-tag sa ka lungsod o siyudad o distrito, mag-atbang sa sunod nga pinilay.

Iyahang gisaad nga ang tanang sakop sa partido mahatagan og patas nga suporta. Atol usab sa maong kalihokan gipresentar sa One Cebu ang opiysal nga mga kandidato niini sa kongreso kinsa halos tanan incumbent.

Sa unang distrito mao si Kongresista Rhea Gullas; sa segundo distrito si Edsel Galeos; sa ikatulong distrito si Pablo John “PJ” Garca; sa ika-upat nga distrito si Janice Salimbangon; sa kinto distrito si Duke Frasco; sa ika-unom nga distrito si Daphne Lagon; sa ika-pito nga distrito mao si Patriccia Calderon ang asawa ni Kongresista Peter John Calderon nga anaa na karon sa iyang ulahing termino pagkakongresista; sa Mandaue lone district si Emmarie “Lolypop” Ouano-Dizon;.

Apil usab nga nialyansa sa One Cebu nga buot magpapili pagkakongresista sa Cebu City North mao si Rachel “Cutie” Del Mar; Lapu-Lapu City lone district mao si Ma. Cynthia “Cindi” King Chan ug sa Ako Bisaya Partylist mao si Kongresista Sonny Lagon. (BANAT NEWS)