DOH nanawagan paggamit sa generics nga mga tambal

CEBU, Philippines — Giawhag sa Department of Health Central Visayas Center for Health Development ang katawhan sa paggamit sa generic nga mga tambal tungod kay sama ra kini ka epektibo sa branded apan mas barato.

Subay sa pagsaulog sa Generics Awareness Month, si Dr. Jeanette Pauline Arellano-Cortes, medical officer sa DOH Central Visayas CHD- Environmental and Occupational Health and Medicine Access Section nipadayag nga ang generic nga mga tambal naghatag og susamang kaluwasan ug kaepektibo sa ilang mga branded nga katugbang apan mas barato ang presyo niini.

Matud ni Cortes nga ang generic nga mga tambal nga gi-procure sa DOH kinahanglan pa nga moagi og inspection ug aproba sa Food and Drug Administration (FDA) sa dili pa i-distribute ngadto sa provincial health offices, city o municipal health offices, ug uban pang health centers.

Gibutyag ni Cortes nga adunay pipila ka tests nga buhaton ang FDA aron masuta ang ka epektibo sa tambal o kong mao ba ang hustong substance nga anaa niini.  Ug kong makuha na sa DOH ang clearance, certificate, o aproba gikan sa FDA anha na ipagawas sa ahensiya ang mga tambal.

Matag buwang sa Septiyembre, ang DOH mag-obserba kini sa Generics Awareness Month alang sa paggamit sa generic nga mga tambal diin karong tuiga aduna kini tema nga "Generics Para sa Kalidad na Alaga at Ginhawang Abot Kaya". (BANAT NEWS)