Garcia: 11 ka contingent na ang nagtinguha nga moapil sa Sinulog 2025

CEBU, Philippines — Niabot na ngadto sa 11 ka contingent ang nipadangat sa ilang tinguha nga moapil sa Sinulog 2025 nga ipahigayon diha sa Cebu City Sports Center.

Kini ang gibutyag ni Acting Cebu City Mayor Raymond Alvin Garcia nga nahinabi sa mga tigbalita.

Matud pa ni Garcia nga nagkatigom na sila uban sa Sinulog Foundation Board niadtong nakalabay nga semana ug malipayon siya sa resulta niini nga gitambongan sa pipila ka konsehal sa siyudad.

Si Garcia nagkanayon nga nindot kaayo ang ilang tigom sa board diin makita ang ilang maayo nga pagtuki, tinabangay ug koordinasyon alang sa nagsingabot nga Fiesta Señor.

Gibutyag ni Garcia atol sa ilang tigom nga ang ilang buhaton dili lang selebrasyon sa pista apan halad alang kang Santo Niño ug buhaton nila nag tanan aron kini magmalampuson ug isalindot nila bisan unsay mga color nila sa politika.

Si Garcia nagkanayon nga nasabotan usab nila atol sa meeting nga padak-an nila ang premyo ug subsidy sa mga moapil aron mas daghan pa ang maenganyo nga moapil.

Gipaaabot ni Garcia nga mao kini ang pinakadako ug pinakabongga ug grandiyoso nga Sinulog tungod kay dili lang lokal o sa Pilipinas ang nipadayag nga moapil adunay gikan sa gawas usab sa nasud.

Gipahibalo ni Garcia nga sa Cebu City Sports Center na ipahigayon ang Sinulog 2025. (BANAT NEWS)