Batan-on nalumos; 64 anyos naligid sa pangpang patay

CEBU, Philippines — Nakit-an na ang 14-anyos nga batang lalake nga gikatahong na-missing samtang naligo sa Lake Damon sa dakbayan sa Toledo apan patay na kini kagahapon sa buntag, Martes, Septiyembre 24, 2024.

Ang bata positibo nga giila sa pamilya niini kinsa tulo ka adlaw nga nangita kaniya human na-missing samtang nangaligo sa Damon Lake sa Purok 2, Barangay Luray sa maong siyudad niadtong adlaw’ng Sabado.

Matud pa duna kini kaubang upat ka mga higala gikan nanguha og kaka sa maong dapit ug nakadesider nga  modalikyat og pangaligo.

Apan giingong nalumos kini ug wala na makahaw-as sa sapa hinungdan nga na-missing og tulo ka adlaw.

Hinoon, ang pamilya sa biktima dili mobasol sa mga higala niini sanglit gatuo sila nga disgrasya ang nahitabo sa ilang anak apan ilang giangkon nga lisod pa gyud alang kanila ang pagdawat sa hitabo.

Samtang patay ang usa ka 64-anyos nga lolo human gikatahong naligid sa pangpang kay giingong hubog diha sa Purok Dahlia, Barangay Magsico, Lungsod sa San Fernando, Martes sa kaadlawon, Septiyembre 24, 2024.

Ang biktima mao si Expedito Sialmo Sandoy, 64, residente sa Purok Morning Glory, Barangay Bugho sa maong Lungsod kinsa wala nay kinabuhi nga nagbuy-od sa kasagbutan.

Sa imbestigasyon sa San Fernando Police Staetion , namista si Sandoy sa maong dapit ug nakainom kini.

Niadtong Sabado giingong gitagayan pa ang biktima sa mga kabanay apan Domingo sa buntag giingong wala na kini mipauli hinungdan nga gipangita sa mga kabanay.

Apan kagahapon adlaw nga Martes napalgan kini sa ubos sa pangpang nga patay na ug nagsugod na og kadugta. Gituohan nga tungod sa kahubog nahulog kini sa maong mabaw nga pangpang ug didto nakabsan sa kinabuhi. (BANAT NEWS)