42 dakpan sa derby sa kaka

CEBU, Philippines — Naghuot sa Pari-an Police Station 1 sa Cebu City Police Office(CCPO) ang 42 ka tawo nga nadakpan human gironda ang usa ka balay diin dunay gipahigayong ‘derby’ sa kaka diha sa Sitio Lawis, Barangay Lorega San Miguel, Dakbayan sa Sugbo, Lunes sa gabii, Septiyembre 23, 2024.

Sa 42 ka mga tawo nga nadakpan ang pinakabata nag edad og 19-anyos ug ang pinakatiguwang kay 64-anyos.  Ang mga dinakpan mga residente sa nagkalain-laing sitio sa Barangay Lorega San Miguel.

Nagkanayon si Police Major Marvin Fegarido, hepe sa Pari-an Police Station miingon nga ang ilang opisina nakadawat og tawag gikan sa 911 operator may labot sa ilegal nga sugal nga pagpaaway sa kaka.

Pag-abot sa mga polis sa lugar, walay nakabantay kanila kay ang tanan nakatutok sa sangka sa kaka maong wala nilay nakaipsot  kay usa ray entrance ug usa ra sab ang exit.

Nasayran nga sa usa ka balay nga wala pa mahuman og tukod gihimo ang sugal diin ang pinagamay nga pusta kay 50 pesos ug pinakadako kay 500 pesos.

Nakompiskar sab sa kapulisan ang upat ka buok improvised nga sudlanan sa 32 ka buhing kaka ingon man improvised spider fighting arena nga dunay stick ug stand platform table ug kwarta nga P2, 470 nga pusta.

Usa sa mga nadakpan mao ang 35-anyos nga lalake nga nipalit og barbecue apan samtang nagpaabot maluto nihapit kini og tan-aw sa sultada.  Sa dihang gibukotan na ang kaka wala na sila kabantay nga gibukutan na sab sila sa police.

"Ang galabi ang tawo ra gyud,  nanan-aw, gamay ra’g kaka unya daghang tawo. Banha kay naa may mag masyada," sigon sa dinakpan.

Kasong kalapasan sa Presidential Decree 1602 o illegal gambling ang ipasaka batok sa mga suspetsado. (BANAT NEWS)