Mga tawo nagtuo nga dunay tulis, SIMEX ra diay
CEBU, Philippines — Naukay og makadiyot ang mga tawo sa dihang kalit nga nangabot-abot ang mga polis diha sa usa ka pawnshop nga nalambigit sab og money transfer sa dalan Leon Kilat sa Cebu City kagahapon sa buntag.
Apan simultaneous simulation exercise ra diay ang gihimo Cebu City Police Office aron makita unsa kaabtik ug masukod ang katakos sa mga pulis sa siyudad sa pagtubag sa mga alarma nga naglambigit sa mga krimen sama sa tulis.
Ang usa sa scenario, usa na sab ka pawnshop sa downtown area ang gitulis og upat ka tulisan nga sakay og motorsiklo ug dali nga nakasibat.
Nangabot ang mga polis, imbestigador ingon man si Police Colonel Antonietto Cañete, Acting City Director sa Cebu City Police Office samtang ang ubang unit nag hot pursuit operation sa suspect ug dunay mga dalan nga gipangbabagan kay maoy giagian sa mga suspek gamit ilang mga getaway vehicles.
Nagkanayon si Cañete malampuson ang ilahang simulation exercise nga ang tumong mahibawo ang katawhan ingon man ang mga establisemento sa ilahang papel kun dunay mga ingon ani nga panghitabo.
"Okay naman pero practice makes perfect mao nay kuwang nato diha, kana siguro we have a regular conduct of simulation exercises not only to improve the capability ng ating mga PNP personnel also sa atin sing stakeholders at clients," ni Cañete pa.
Human sa simulation exercise dunay debriefing nga gihimo ug gituki ang ilang tagsa-tagsa ka obserbasyon ug rekomendasyon aron kini maoy timan-an sa mga angayan ug gikinahanglang buhaton.
Usa ka magpapatigayon nga si Jo Aranas naahat og biyaw sa iyang tindahan aron pagsusi sa komosyon kay nagtuo siyang duna nasay gitulis. Matud niya gikuyawan siya tungod kay nahitabo na kini dinhi sa siyudad ug nagpasalamat siyang simex ra diay. (BANAT NEWS)
- Latest
