Marcos nipirma og duha ka balaodnon alang sa maritime zone

CEBU, Philippines — Nipirma kagahapon og duha ka balaodnon si Presidente Ferdinand Marcos aron palig-onon ang katungod ug responsibilidad sa Pilipinas sa mga maritime zone niini.

Ang mga mga balaodnon naglangkub sa Philippine Maritime Zones Act ug Philippine Archipelagic Sea Lanes Act nga matud sa presidente mga mahinungdanong balaod nga nagpasiugda sa importansiya sa atong maritime ug archipelagic identity.

Gipadayag ni Marcos atol sa ceremonial signing sa Malacañang nga ang legislation nagdala sa mga domestic nga balaod nga nahiuyon sa international nga mga sumbanan labi na ang UN Convention on the Law of the Sea (UNCLOS) nga nagpauswag sa kapabilidad sa pagdumala ug nagpalig-on sa mga palisiya sa maritime alang sa pagtubo sa ekonomiya ug nasudnon nga seguridad.

Ang "Philippine Maritime Zones Act" nagdeklara sa mga maritime zone sa Pilipinas subay sa mga sumbanan nga gitakda sa UNCLOS ug naglakip sa pagtukod og archipelagic nga mga sea lane nga maghimo og mga rota sa katubigan ug airspace sa nasud.

Tumong sa maong mga balaod aron masiguro ang mga katungod ug responsibilidad sa nasud nga nagtugot sa mga Pilipino ilabi na ang mga mananagat nga makapanginabuhi nga walay kahadlok sa pagpang-harass.

Ang maong balaod uban sa "Philippine Archipelagic Sea Lanes Act", naggama og plataporma alang sa luwas nga pagtabok sa mga langyaw’ng barko ug eroplano pinaagi sa gipahimutang nga mga rota samtang nanalipod sa nasudnong seguridad ug mga sumbanan sa kalikupan.

Matud usab ni Marcos nga ang duh aka balaod nagpakita sa pasalig sa Pilipinas sa pagpanalipod sa territorial water niini ug sa pagpalambo sa responsableng pagdumala. —/BDB (BANAT NEWS)