Kanhi City admin giposasan

CEBU, Philippines — Giposasan sulod sa Cebu City Hall si suspended City Administrator Atty. Collin Rosell sa sulod sa buhatan sa mayor’s office kagabii.

Ang hepe sa Cebu City Police Office Antonietto Cañete mao ang midakop kang Rosell kinsa makita sa video sa social media nga nagpunay og kisi-kisi kay dili magpaposas.

Sa sayo pa kagahapong adlawa, dunay nahitabong tensyon diha sa city hall human nga mipatim-aw ang kampo ni dismissed mayor Michael Rama ug nisuway  sa pagsulod og balik sa iyang kanhi buhatan apan wala mahinayon tungod kay gikandaduhan kini.

Hinungdan nga nagpa-blotter si City Legal Officer Atty. Santiago Ortiz sa Waterfront Police Office.

Si Rosell nagpahigayon og press conference kauban ang mga abogado ni Rama diha sa conference room sa mayor’s office nga matud pa walay pagtugot gikan sa Ombudsman ug DILG-7 ug wala sab kini mananghid sa kasamtangang mayor nga si Raymond Alvin Garcia.

Niadtong Oktubre 9, naserbihan og notice si Rosell gikan sa buhatan ni Mayor Garcia nga napupos na ang coterminous appointment niini human nga si Rama gi-dismissed sa katungdanan pagka-mayor sa siyudad.

Ang kampo ni Garcia miingon nga wala na nila gi-recognize si Rosell isip City Administrator.

Sa nahitabong press conference, matud pa ni Rosell nga natapos na ang unom ka buwan nga preventive suspension ni Rama lakip na ang laing pito ka mga indibidwal diin usa siya niini. Nasuspenso sila sa Ombudsman tungod sa reklamo sa pipila ka kawani sa City Hall nga wala masweldohi.  Ang maong preventative suspension nagsugod kini niadtong Mayo 10, 2024 ug natapos kini niadtong Nobiyembre 6, 2024.  Apan si Rama gi-dismissed sa serbisyo tungod sa laing kaso nga ‘nepotism.’ Apan si Collin ug Rama  padayung miinisister nga wala sila makadawat sa kopya sa giingong hukom sa Ombudsman kabahin sa pagkatakta niini sa pagkamayor.

Mao nga nagpadala og suwat ang mga abogado ni Rama sa buhatan sa Ombudsman Visayas ug sa DILG-7 aron mangayo og katin-awan sa estado sa pagpa-implementar sa pagpalagpot kaniya gikan sa katungdanan.

Samtang wala pay tubag, gideklarar ni Rosell nga mobalik si Rama sa pagdumala sa City Hall.  “Laktod pagkasulti, sa kasamtangang kahimtang, walay makapugong sa pinili ug tinud-anay nga mayor sa Sugbo (Rama) sa pagdumala pagbalik isip mayor. Ang pagpadayag sa pagbalik mahinungdanon aron malikayan ang laing mga kalapasan dala sa pagdumili pagbalik. Labaw sa tanan, ang pagbalik mao ang pagrespeto sa pagpili ug kabubut-on sa katawhan,”matud pa sa press statement gikan sa mga abogado ni Rama.  Sa habig ni Garcia, matud pa niya nga kun mobalik man si Rama ug ang mga kaubanan nga nasuspenso, kinahanglan nga mopahibalo sila kaniya ug dili maghimo og komosyon sa sulod sa city hall. —/IBM (BANAT NEWS)