Ortiz gitudlo nga bag-ong Cebu City legal officer
CEBU, Philippines — Si Atty. Santiago L. Ortiz, Jr. ang gitudlo nga bag-ong Cebu City Legal Officer isip hulip ni Atty. Carlo Gimena atol sa regular session sa konseho niadtong Septiyembre 4, 2024.
Nagsugod og pagpangalagad si Atty. Ortiz sa City Hall sa panahon pa ni anhing Mayor Edgardo Labella hangtud nga nahimo siyang sakop sa legal team ni Konsehal Rey Gealon.
Sa wala pa hingpit nga naaprobahan ang iyang pagkatudlo, natuki sa konseho ang kabahin sa kapakyas sa City Legal Office sa paghatag og kopya sa mga kontrata ngadto sa konseho nga naaprobahan sa niaging mga higayon.
Dali sab nga mipasabot si Konsehal Gealon atol sa deliberation nga resulta kini sa kapakyas sa pagbilin og hard copy sa mga naaprobahan nga kontrata ngadto sa City Legal Office.
Mipasalig si Atty. Ortiz ngadto sa konseho nga dili siya magmakuli sa paghatag og kopya sa mga maaprobahan nga kontrata sa siyudad kun siya na ang molingkod isip legal officer tungod kay kini public records. (BANAT NEWS)
- Latest
