Kongresista Gullas suportado sa unom ka mayor sa unang distrito

CEBU, Philippines — Gisuportahan sa unom ka mayor sa unang distrito sa lalawigan sa Sugbo si kongresista Rhea Gullas sa iyang tinguha nga magpapili pagbalik sa ikaduhang higayon isip kongresista sa unang distrito.

Samtang si Talisay City mayor Gerald Anthony “Samsam” Gullas nga mao ang lider sa grupong Alayon nagkanayon nga siya motiwas sa iyang termino isip mayor sa Talisay.

Ang iyang kapikas nga si Rhea mosuway sa pagpapili pagbalik sa kongresista sa sunod tuig nga piniliay.

Gikalipay ni Gullas nga pabilin ang suporta sa mga mayor ngadto kang Rhea gikan sa Talisay hangtud sa lungsod sa Sibonga.

Samtang si Carcar City mayor Patrick Barcenas naa sab sa landong sa partidong Alayon.

Ang kaatbang ni Barcenas kaniadto nga si Nice Apura pabilin gihapon nga naa sa Alayon.

Napanglantawan nga posible nga way hilabtanay sa dakbayan sa Carcar sa sunod tuig nga piniliay. MEL BANAT NEWS