Menor nga nanulis na-rescue

CEBU, Philippines — Na-rescue sa kapulisan sa Labangon Police Station 10 pinangulohan ni Major Eraño Regidor ang usa ka menor de edad samtang nakaikyas ang 21-anyos niini nga kauban niini sa pagtulis sa duha ka tinun-an niadtong Dominggo sa alas 3 sa kaadlawon diha sa Guadalupe Village, Barangay Punta Princesa, siyudad sa Sugbo.

Ang menor de edad  nag-edad og 16 anyos, nagpuyo sa San Jose Village, Barangay Tisa samtang ang nakaikyas mao si Brent Joshua Natividad, 21-anyos, residente sa Santa Monica Subdivision sa mao gihapong barangay.

Ang mga biktima mao sila alyas John Carlo, 18 anyos ug alyas Mike, 15, pulos nagpuyo sa Greyhound Village, Barangay Kinasang-an.

Giingong kalit lang sila giduol sa duha mga suspetsado ug gipangtionan og armas ug mideklarar og tulis.  Nakuha sa mga tulisan ang cellphone sa duha ka mga biktima ug daling misibat sakay sa motorsiklo.

Ang mga biktima nidangop sa Labangon Police Station ug sa follow up operation naabtan ang menor de edad apan nakaikyas si Natividad.

Na recover gikan sa menor ang cellphone sa duha ka biktima ug nakuhaan sab ug kalibre .38 revolver nga dunay duha ka bala.

Si Police Major Eraño Regidor, hepe sa Labangon Police Station 10 nga kadtong nakaeskapo lider-lider kini sa mga badlungong batan-on sa Tisa ug nadakpan na kini kaniadto tungod gihapon sa pagpanulis. (BANAT NEWS)