Mga pasahero nidagsa sa CSBT

CEBU, Philippines — Mga pasahero nidagsa diha sa Cebu South Bus Terminal aron mamauli ngadto sa ilang tagsa-tagsa ka mga lugar sa Probinsiya sa Sugbo gumikan sa long weekend.

Sugod kagahapon ang holiday human gibaylo ang Ninoy Aquino Day nga saulogon unta niadtong Agosto 21, 2024 ug lahos na kini sa Lunes sa kasaulogan sa National Heroes Day.

Si Police Colonel Maria Theresa Macatangay, deputy director for operation sa Cebu City Police Office nagkanayon nga gipaneguro nila ang seguridad sa terminal tungod sa long weekend ug apil kini sa full alert deployment.

Adunay mga polis nga gipabantay usab sa mga terminal aron masiguro nga luwas ang mga sumakay.

Subay niini, gilaoman nga dagsaon sa mga tawo ang kadagatan ug mga resort sa Dakbayan sa Talisay karong long weekend hinungdan nga ang Talisay City Disaster Risk Reduction and Management Office (CDRRMO) nipahinumdom sa Community First Responders nga magmabinantayon.

Si Joel Sisa, operation head sa CDRRMO nagkanayon nga nakig-alayon sila sa CFR aron sila matabangan sa pag-monitor sa beaches ug resorts.

Matud ni Sisa nga gisangonan nila ang CFR nga mag-roving ug sila usab ang mo report diha sa ilang buhatan kong daghan ang tawo nga nangaligo.

Ang paborito nga kaligoan sa katawhan mao ang kadagatan sa Barangay Poblacion, Cansojong ug Dumlog.

Gipahinumduman ni Sisa nga kinahanglang adunay mga hamtong ang magbantay sa mga bata nga mangaligo paglikay sa disgrasya ug ang mga nasobrahan og inom sa ilimnong makahubog angayang dili na lang pakaliguon sa dagat.

Samtang ang adunay mga gipamati sa lawas sama sa high blood likayan ang grabe nga kainit.

Dugang ni Sisa nga kong aduna man gani emerhensiya motawag dayon og tabang ug labing maayo nga adunay mga emergency numbers nga gi-save sa mga cellphone. — BDB BANAT NEWS