Mga scholar sa Talisay nga nigradwar gipasidunggan

CEBU, Philippines — Gipasidunggan ang pito ka Talisaynon nga maoy nag una sa Cream of the Crop Scholar Program nga nigraduate na sa ilang lain-lain nga kurso. Sa pito ka Talisaynon, lima ang nakakuha og latin honors nga maoy gipasigarbo ni Talisay City mayor Gerald Anthony “Samsam” Gullas.

Si Gullas nihimo niini nga programa upat ka tuig na ang nakalabay kay siya naghuna-huna sa mga Talisaynon nga angayan nga pa ekswelahon sa unibersidad sa siyudad sa Sugbo gumikan sa ilang abilidad apan di makakaya sa gastohan.

Ang pito ka scholar sa Talisay nga nigraduate mao sila si Danilo Basallo Jr. graduate sa Bachelor or Secondary Education Major in Science sa University of San Jose Recoletos diin siya Magna Cum Laude; Christian Lloyd Donaire sa Bachelor of Science in Financial Management sa USJR ug siya Magna Cum Laude; Shanene Lacida graudate sa Bachelor of Science in Psychology sa University of San Carlos ug siya Cum Laude; Augen Dyle Nacario graduate sa Bachelor of Science in Management Accounting sa Talisay City College ug siya Cum Laude; Jonahh Mae Rabaya graduate sa Bachelor of Science in Management Accounting sa USC ug siya Cum Laude; Jay Nagsingan sa Bachelor of Science in Hospitality Management sa TCC ug si Remwel Villarino sa Bachelor of Science in Marine Transportation sa University of Cebu.

Ang programa gihimo aron mangita og tinun-an nga kwalipikado nga gipili sa taga Department of Education (DEPED).

Gipasabot ni Gullas nga walay bisan usa sa taga City Hall ang apil sa pagpili sa scholar ug wala sab niya tugoti nga adunay eskolar nga mopili sa pagtungha sa University of the Visayas (UV) aron likay sa mga pagduda tungod kay gipanag-iya man sa ilang pamilya ang tunghaan.

Ang Talisay maoy nibayad sa ilang tuition fee samtang gihatagan sab sila og P20mil nga allowance matag semester. (BANAT NEWS)