Sugbo Kahanas nga ordinansa aprobado na

CEBU, Philippines — Giaprobado na sa third ug final reading ang ordinansa nga nag-institutionalize sa laing programa sa Probinsiya sa Sugbo nga nagtutok sa pagpalambo sa kahanas sa mga Sugboanon.

Ang hunta probinsiyal niaproba sa third ug final reading sa Sugbo Kahanas nga ordinansa atol sa regular nga sesyon niini niadtong Lunes.

Ang maong programa ubos sa pag-alayon sa Probinsiya sa Sugbo ug sa Technical Education and Skills Development Authority Region (TESD)-7.

Ubos sa maong balaod,ang edukasyon ug skills training mamahimong makuha sa mga partisipante sa mga TESDA-accredited nga Technical-Vocational Institution (TVI).

Ang Probinsiya sa Sugbo pinaagi sa Provincial Social Welfare and Development Office (PSWDO) maoy mangulo sa maong programa uban sa TESDA-7.

Ang Probinsiya sa Sugbo ang mogahin og pundo alang sa maong training sa mga TESDA-accredited nga TVIs.

Ang Kapitolyo usab ang mo screen sa mga partisipante base sa guidelines nga gilatid sa TESDA.

Nasayran nga ang Kapitolyo mogahin og P100 milyones sa matag season o implementasyon sa maong programa.

Apil sa obligasyon sa Kapitolyo mao ang pagpalit ug paghatag og starter kits sa mga partisipante subay sa giya nga gihatag sa TESDA-7 ug ang paghatag og teknikal ug administrative assistance ug suporta pinaagi sa allowance sa mga partisipante.

Samtang ang TESDA-7 maoy mogamit sa pundo nga gibubo sa Kapitolyo pinaagi sa pagbayad sa mga ipahigayon nga training ug entrepreneurship fee sa mga TVI.

Ang maong ahensiya usab ang moproseso sa ubang bayranan kalabot sa maong training hangtud makompleto sa partisipante ang training niini.

Mosumiter usab ang TESDA-7 og listahan sa mga trainees-grantees nga nakagradwar na ug moisyu og certification.

Si Bokal Glenn Anthony Soco kinsa nangamahan sa maong ordinansa nagkanayon nga niabot na ngadto sa 11, 731 ang naka-enroll sa maong skills traning nga programa sukad sa season 1 niini.

Sa pagkakaron, adunay 3,599 ka beneficiary ang maong programa alang sa season 3 niini.

Ang Sugbo Kahanas usa ka programa sa Probinsiya sa Sugbo nga naumol paghatag og training sa mga Sugboanon aron mapalambo ang mga kahanas niini nga mamahimong magmit sa pagpangita og panginabuhian. (BANAT NEWS)