SUV sa mga tulisan nakuha sa CCTV, tag-iya gipangita na

CEBU, Philippines — Sa nagpadayong imbestigasyon sa Special Investigation Task Group(SITG) may labot sa nahitabong pagpanulis sa duha ka mga jewelry stores diha sa F. Calderon Street, Barangay Ermita, siyudad sa Sugbo niadtong Huwebes sa buntag, Agosto 8, 2024, ang kapolisan mibutyag nga nahibaw-an na nila ang usa sa gisakyan sa mga tulisan sa ilang pag-ikyas.

Ang maong sakyanan gikataho nga kolor Silver/Gray Mitsubishi Adventure nga dunay plate no. DAB-5200. Nagkanayon si Police Lieutenant Colonel Maria Theresa Macatangay, tigpamaba sa Special Investigation Task Group (SITG) nga na-trace nila kini pinaagi sa mga kuha sa mga CCTV cameras.   Nasubay sab kun asa kini miadto human sa pagpanulis, lakip sa mga lugar nga giadto niini ang Talisay City ug mibalik na sab sa Cebu City dayun milabang sa Mandaue City.

Wala gisalikway sa SITG ang posibilidad nga giusab na karon ang plate number o kaha ang itsura sa sakyanan.

"Right now the area is quite wide for us to conduct really a search that's why we are giving this to the public and appealing to all of you in the community to help us locate this vehicle," panawagan ni Macatangay.

Matud pa sa kapolisan tulo ka motorsiklo ug usa ka four-wheel vehicle ang nahibaw-an nilang gigamit nga getaway vehicle sa mga tulisan, apan wala nila gisalikway ang posibilidad nga duna pay laing mga sakyanan nga gigamit ang grupo. Una nang na-recover sa kapulisan ang usa sa mga motorsiklo nga gigamit gihapon sa mga tulisan sa paghimo sa krimen diin gi-trace nila ang tag-iya niini.

Sigon ni Macatangay naestorya na nila ang usa sa nahimong tag-iya sa maong motorsiklo tungod kay kalima na kini nabaligya ang maong motor, apan ang katapusang nakapalit wala pa nila mailhi. (BANAT NEWS)