Kanus-a ipadakop ug unsaon
Sama nga wala kabadlong ang administrasyon ni Presidente Ferdinand Marcos Jr. sa imbestigasyon sa International Criminal Court (ICC) batok ni kanhi Presidente Rodrigo Duterte ug sa iyang mga sinugo, dili sab makadiktar ang Malakanyang unsay sunod nga himuon sa ICC.
Ang ICC ray magbuot kinsa pa sa mga opisyal sa kapolisan ug sa ubang ahensiya sa gobiyerno nga naapil sa laktod nga pinatyanay sa drug war ang ilang ipatawag, kanus-a tapuson ang ilang pormal nga imbestigasyon, kanus-a luwatan ang arrest warrants ug kinsa pa ang ubang ipadakop gawas ni Duterte.
* * *
Mapalambo ang politikanhong interes sa administrasyong Marcos kon ipadakop na sa ICC pinaagi sa International Criminal Police Organization (Interpol) silang Duterte ug kaubanan sa dili pa ang eleksiyon sa Mayo 12, 2025. Aron matanggong na sa Scheveningen Prison sa The Hague sa Netherlands ug dili na makaapil sa kampanya.
Mahimong mas komplikado ang sitwasyon kon liwas sa eleksiyon mapagawas ang arrest warrants. Labi na kon modayon pagdagan ug makadaog pagka senador ang kanhi presidente. Makaaangkon og dugang plataporma pagpangilad nga ang ICC kabahin sa politikanhong pagpanggukod nga ilang nahiagoman.
* * *
Samtang dili madiktaran, ang liderato sa ICC dili buta ug bungol sa politikanhong kahimtang sa mga nasud nga may mga kaso silang gi-imbestigar. Maong bisan mas una ang imbestigasyon sa gipasangil nga crimes against humanity batok ni Duterte, mas unang napagawas ang arrest warrants batok nilang:
• Russian President Vladimir Putin tungod sa pagpangatake sa Ukraine (nga gihangop sa Estados Unidos); ug
• Israeli Prime Minister Benjamin Netanyahu tungod sa gubat sa Gaza (nga gihangop sa mga kaatbang sa Estados Unidos).
* * *
Samtang nagkaklaro nga imbes supakon madasigon nga ipatuman sa administrasyong Marcos ang sugo sa ICC pagpadakop ni Duterte ug sa iyang mga sinaligan, nagkabantang sab nga mas nilig-on ang kaso tungod sa pagbalitok sa pipila ka tigpatuman sa pinatyanay (may banabana gani nga mayoriya sa 50 ka heneral nga gipakighinabian sa ICC ang niuyon sa pagtabang sa imbestigasyon).
Pangutana: Kon inutil ang kapolisan sa pagdakop sa ubang mga pinangita sama nilang Apollo Quiboloy, Mayor Alice Guo ug Heneral Gerald Bantag, unsa may ilang mahimo batok sa mas mat-an ug mas dagkong mga dakpunon?
* * *
- Latest
