Gun amnesty

Dunay akong amigo nga nangutana kon wa ba’y plano ang kadagkoan sa Camp Crame nga mohatag og gun amnesty aron kadtong mga nagtipig og mga dili lisensyadong armas, mahimo nila nga legal ang paghupot sa ilang mga pusil.

Abtik ko nga mitubag nga pagka karon, wa pa ko’y nahibaw-an nga nagplano ang kadagkoan sa Philippine National Police (PNP) nga mohatag og gun amnesty. Nasayran nako nga ang ako diay’ng amigo, dunay karaang armas nga way lisensya.

Gusto niya nga mahimong legal ang paghupot niya sa maong pusil mao nga nangandoy siyang duna unta’y gun amnesty. Sus, kanindot ra ba sa armas sa akong amigo kay karaan kini nga Thompson sub-machinegun.

Giingnan nako siya nga bisan og duna pay gun amnesty dili ko makapaniguro nga mahatagan siya’g pagtugot nga makapalisensya sa maong matang sa pusil.

Sayonan ka, ang Thompson sub-machinegun 45 kalibre ang bala niini, unya kay taas-taas man ang barrel niini, mauwaw ka gyud nga mobangon kon maigo ka.

Sa ila sab kunong dapit sa Barili, duna pay iyang mga amigo nga naghupot gihapon og armas nga way lisensya. Diha pa ko mitug-an niya nga didto sab sa Bogo City, may mga kaila ko nga naghupot sab og pusil nga way lisensiya.

Bitaw, nindot gyud tuod nga ang kadagkoan sa Camp Crame, ang headquarters sa Philippine National Police (PNP), mohatag og gun amnesty aron nga malisensyahan ang mga armas nga pagka karon maisip nga ilegal.

Ikaduha, makakwarta pa ang kagamhanan gikan sa bayad sa pagpalisensiya sa mga tawo nga gustong moparehistro sa ilang armas.

Ang unang himoon niadtong gustong moangkon og armas sa legal nga paagi, molukat sila og License To Own and Possess Firearms (LTOPF), ug kinahanglan nga molukat sila’g mga permit niini.

Kon duna na sila’y LTOPF, ang ilang mga pusil irehistro nila ubos sa ngan sa ilang LTOPF, ug mobayad na usab sila og Firearms Registration.

Unya, kon ang tag-iya sa armas gusto nga dala-dalahon niya ang iyang armas gawas sa ilang panimalay, kinahanglang molukat na usab sila og Permit to Carry Firearms Outside of Residence.

Ang gitawag og PTCFOR dili basta-basta ang pagkuha, kay moagi ka og neuro test nga sukdon ang imong pangisip kon wa bay posibilidad nga kon magdala ka a’g armas, basin magpataka ka lang og pamusil.

Dayon, sutaon kon dili ka ba drug addict. Kon makapasar ka, mobayad ka pa og P12,000 sa PTCFOR nga mohatag nimo’g permit nga madaladala ang armas sulod sa duha ka tuig.

Dili sayon no?