Tirador nasikop sa kapolisan human gialarma nga nanion og pusil

CEBU, Philippines — Nasikop sa kapolisan sa Mambaling Police Station ang usa ka lalaki nga giingong gun-for-hire diha sa Spolarium Street, Barangay Duljo Fatima, Siyudad sa Sugbo kagahapon sa buntag.

Ang suspetsado mao si alyas “Vlad”, 18-anyos, giingong tirador ug residente sa naasoy nga lugar.

Base sa taho sa Mambaling Police Station nga ang suspetsado gialarma kini tungod kay giingong nanion og armas sa ilang silingan.

Ang mga sakop sa BPSO maoy nakasikop sa suspek ug gitugyan  ngadto sa kapolisan.

Nakuha gikan sa suspetsado ang kalibre .9mm pistol nga adunay duha ka buhing bala.

Nasayran nga ang suspetsado napasakaan na og kasong homicide niadtong Mayo 24, 2024 gumikan sa pagpamusil niini diha sa Sitio Pungtod, Barangay Mambaling.

Gikataho nga ang suspetsado maoy responsible sa pagpatay niadtong Mayo 25, 2024 diha sa Sitio Wangyu, Barangay Mambaling.

Kasagarang gipamusil sa suspetsado giingong nalambigit sa ilegal nga drugas.

Sutaon usab sa kapolisan ngadto sa piskaliya ang status sa kaso sa suspetsado.

Sa laing bahin, nikunhod ang mga panghitabo nga pagpamusil sa Dakbayan sa Talisay kini base sa datos sa kapolisan sa siyudad.

Si Police Lieutenant Colonel Epream Paguyod, hepe sa kapolisan sa siyudad nagkanayon nga gikan sa buwan sa Abril hangtud sa Hulyo niining tuiga niubos ang kaso sa pagpamusil itandi sa niaging tuig.

Ang maong mga buwan mao usab ang paglingkod ni Paguyod isip hepe sa kapolisan sa Dakbayan sa Talisay.

Nasayran nga sa niaging tuig tulo ngadto sa upat ka pagpamusil o patay ang nahitabo kada buwan.

Apan karon anaa na lang sa usa o duha ka kaso sa pagpamusil o patay ang mahitabo sa siyudad.

Matud ni Paguyod nga ang kampaniya batok sa paggukod sa mga tawo nga nahupot og dili lisensiyado nga armas ang dako nga nakatabang niini. (BANAT NEWS)