87 ka tawo sikop atol sa SACLEO sa LCPO

CEBU, Philippines — Niabot ngadto 87 ka tawo ang nasikop atol sa gipahigayong Simultaneous Anti-Criminality Law Enforcement Operation (SACLEO) sa kapolisan sa Lapu-Lapu City Police (LCPO) niadtong Agosto 7, 2024 sa tungang gabii hangtud sa Agosto 8, 2024 sa tungang gabii.

Si Police Lieutenant Colonel Christian Torres, tigpamaba sa LCPO nagkanayon nga nalakip sa 87 nga ilang nadakpan ang usa ka 26 anyos nga high value individual nga pusher nga giila nga si Mark Niño Calinihan, lumad nga Tagbilaran, Probinsiya sa Bohol.

Nasakmit sa kapolisan gikan sa suspetsado ang P13.6 milyones nga kantidad sa shabu.

Si Torres nagkanayon nga ang mga ebidensiya nga ilang gipadala ngadto sa Philippine Drug Enforcement Agency-7 alang PNP Laboratory.

Nalakip sa maong gidaghanon nga nadakpa sa SACLEO sa LCPO mao ang 47 ka tawo nga naaktohan sa nagpatrolya nga kapolisan nga nanigarilyo diha sa publikong lugar ug laing nadakpan mao ang 21 ka tawo nga naaktohan usab sa mga polis nga nag-inom og ilimnong mkahubog diha gihapon sa publikong lugar.

Dugang ni Torres nga sa gipatuman nga curfew 38 ka menor de edad ang nahipos sa nagpatrolya nga mga polis. — /BDB (BANAT NEWS)