Garcia: damgo sa amahan nga walay ma-eskwater sa siyudad paninguhaon

CEBU, Philippines — Gipasalig ni Cebu City Acting Mayor Raymond Alvin Garcia ngadto sa mga nagkadaiyang homeowners association sa siyudad nga motabang siya sa pagsulbad sa mga suliran ug kahingawa may kalabutan sa kahimtang sa luna nga ilang gipamuy-an.

Kini ang giluwatan nga pasalig ni Garcia atol sa gipahigayon nga consultative dialogue kauban ang mga nagkadaiyang HOA sa siyudad adlaw nga biernes sa buntag.

Sumala pa ni Garcia buoy gayud niyang makakita og kasulbaran sa mga problema may kalabutan sa housing kay duol kini sa iyang kasingkasing.

Dugang pa ni Garcia maoy damgo sa iyang amahan nga si kanhi City mayor Alvin Garcia nga wala nay squatters ang siyudad diin tanan mga tawo makatag-iya og kaugalingon nga yuta.

Atol sa gipahigayon nga consultative dialogue gituki ang may kalabutan sa road right of way, paghimo ug access roads, pagbutang ug drainage system ug uban pa.

Gitahasan ni Garcia sila si Konsehal Jerry Guardo nga maoy chairman sa Committee on Infrastructure sa siyudad nga lihukon ang may kalabutan sa infrastructure samtang ang pangulo sa Division for the Welfare of the Urban Poor Atty. Ronald Anthony "Butch" Librando maoy motutok sa uban nga problema.

Ang sakop sa nagkadaiyang homeowners association mapasalamaton sa pasalig sa acting mayor ug malaumon nga mahatagan kini ug kasulbaran ang ilang mga gipadangat nga problema. (BANAT NEWS)