Chan nanghatag og puhunan sa pagpananum og goso sa Olango

CEBU, Philippines — Gitabangan ni Lapu-Lapu City Mayor Junard "Ahong" Chan ang mga molopyo sa Isla Sa Olango nga makabaton kini og ilang kaugalingon nga panginabuhian gawas sa panginhas ug pagpanagat.

Gibisita ni Mayor Chan ang mga taga Olango kauban ang mga sakop sa Department of Social Welfare and Services (DSWD) aron maoy moapud-apud sa tabang pinansyal isip puhonan alang pagpananum og goso nga laing panginabuhi-an sa mga residente.

Ang mga konsehales sa siyudad og mga opisyales sa barangay Sabang sa Isla sa Olango nitambong usab sa gihimong pag apod apod sa livelihood financial assistance.

Aduna'y 305 ka mga pamilya nga benepisyaryo nga makadawat og tag P9,360.00 igo nga pangpuhonan sa pagpananom og goso.

Suma pa ni Mayor Chan nga kon maayo ang pagdala sa maong panginabuhi-an, dako kini og ginansyahon nga posibling moabot sa 200 porsyento.

Dugang sa mayor nga walay angay nga kabalak-an kon kinsa ang mopalit gumikan kay daghan ang nagpangita niini nga produkto.

Gimando ni Chan nga pabutangan ang lapad nga kadagatan diha sa Minantaw reef og mga payag nga kapundohan alang sa mga mobantay sa tinanom nga mga guso hangtud nga maani kini sa paglabay sa 45 ka adlaw.

Kini maoy ikaduha na nga hugna sa pagpanghatag og puhonan alang sa maong panginabuhi-an, diin ang mga taga isla sa Pangan-an ang unang nakabenepisyo niini.

Nunot niini si mayor Chan nipadayag usab og pasalamat sa buhatan ni Congresswoman Cindi King-Chan nga naggahin maong pundo. Romeo T.  Limpangog/MEL

TESDA giplanohan nga himoong departamento sa Talisay

Nagtinguha ang kagamhanan sa Dakbayan sa Talisay nga himuon nga departamento ang Technical Education and Skills Development Authority (TESDA) sa siyudad. Si Talisay City mayor Gerald Anthony “Samsam” Gullas nibutyag nga gusto nila nga matutokan gyud ang TESDA and Livelihood program.

Gani ang konseho sa Dakbayan nipasar naman og ordinansa labot sa paglain gyud sa TESDA.

Matud pa ni Gullas nga sa ingon niini nga paagi mahatagan gyud og pagtagad ang TESDA kay kini kaayohan rasab sa Talisaynon.

Sa nasayran ang edukasyon maoy usa sa 8-point agenda ni Gullas sa iyang administrasyon.

Niadtong miaging semana, 522 ka Talisaynon ang migradwar sa TESDA didto sa Lagtang Gymnasium.

Sa pagkakaron, ang City Social Welfare and Development (CSWD) pa ang nagdumala sa TESDA pero sa tinguha sa siyudad posible nga matigayon na ang departamento niini.(BANAT NEWS)