Garcia: Puntaryaha ang drug suppliers ug protectors

CEBU, Philippines — Nasakmit sa Sawang Calero Police Station 6 sa Cebu City Police Office(CCPO) ang 1072.5 grams nga shabu nga nagkantidad og P7.2 million atol sa buy-bust operation sa General Gines Street, Barangay Sawang Calero, siyudad sa Sugbo kagahapon sa alas 12 sa tungang gabii.

Ang maong operasyon miresulta sa pagkasikop nila ni Isabel Rogodos Abellana alyas Sabel, 37 anyos, residente sa Sitio Ilang-Ilang, Barangay San Isidro, Talisay City ug usa ka high value individual ug si Ariel Rey Sab Baclay, 38 anyos, residente sa Sitio Ilang-Ilang.

Sa impormasyon sa kapulisan si alyas Sabel usa ka newly identified personality diin ang contact niya sa tinubdan niini sa illegal nga drugas naa sulod sa Cebu City Jail matod pa.

Ang unang transaksyon nahitabo Marso 2024 diin nakadawat kini og usa ka kilo dayon ang ikaduhang transaksiyon nahitabo August 5, 2024 ug duha ka kilong shabu.

Ang usa ka kilo nahatag na sa wala mailhing tawo nga nagsakay og pick-up multicab samtang ang nahibiling usa ka kilo gibutang sa mga gagmay'ng sudlanan basi sa duha ka bulang pagpaniid sa suspek.

Ang area of distribution niini matud pa angCebu ug depende sa tawag sa source ilabi na diha sa Toledo, Cebu City, Talisay City, Talamban, Lapu-Lapu ug Mandaue City.

Samtang nadakpan sa mga operatiba sa Philippine Drug Enforcement Agency (PDEA)-7 uban ang  Naval Forces Central ug Lapu-Lapu City Police Office ang 26 anyos nga drug personality atol sa ilang buy-bust operation sa Sitio Kadulang, Barangay Marigondon, dakbayan sa Lapu-Lapu kagahapon sa alas 2 sa hapon.

Ang suspetsado mao si Mark Niño Caliniahan, 26 anyos, wala'y trabaho ug lumad nga taga Tagbilaran City, Probinsya sa Bohol.  Nasakmitan ang dinakpan og duha ka putos sa gituohang shabu nga nitimbang og duha ka kilo ug gibana-bana nga mobalor og P13.6 million, buy-bust money, Chinese tea packaging, usa ka cellphone ug ubang non-drug evidences.

Nilutaw ang ngalan sa suspetsado sa mga nanglabay nila nga dakop  sanglit sa iyaha tigkuha ang ubang mga nadakpan sa PDEA-7 ug giingong makabaligya kini og usa ka kilo nga shabu kada semana.  Ang area of distribution niini kay Bohol ug Cebu Province apil na ang mga highly urbanized cities. Ang mga dinakpan pasakaan og kasong paglapas sa Sections 5 ug 11, Article II sa Republic Act 9165 ang ipasaka batok sa suspek.

Atol sa pag-imbentaryo sa mga ebidensiya mitungha si Lapu-Lapu City Mayor Junard Chan kinsa una nang namahayag nga walay luna sa iyang siyudad ang mga namaligya niini.

Sa laing bahin, si Cebu City acting Mayor Raymond Alvin Garcia nagtuo nga aduna gyuy mga dagkong drug personalities nga maoy utok niining tanang mga dagkong transaksyon sa ilegal nga drugas ug mao kini ang gusto niyang patutokan sa Cebu City Police Office.

Si Garcia mibisita sa CCPO kagahapon sa buntag  ug mimando sa kapulisan sa paggukod sa mga dagkong drug personalities ug ilang mga drug protectors, samtang gidayeg niya sila sa mga nangaging kalamposan batok ilegal nga drugas apan nabantayan niya sagad sa mga nadakpan kay mga gagmay nga drug pushers.

Gusto ni Garcia nga mo level-up ang kapulisan, gusto sa mayor ang suppliers gyud ang puntaryahon ug dili lang mga drug pushers.

"It's about time that we adopt a strategy that will direct your anti-drug operations against the persons protecting the illegal drug trade, nagtuo ko nga dili gyud ni motunhay nga negosyo kung wala'y nagpaluyo ani, show me that you run after them," ni Garcia pa.

Si CCPO acting City Police Director Colonel Antonietto Cañete miingon nga gi-monitor nila ning mga dagkong drug personalities apan ang uban nila wala dinhi sa siyudad. — Rowena Capistrano/IBM BANAT NEWS