CHO: Kaso sa dengue sa Talisay nikunhod

CEBU, Philippines — Nikunhod ang kaso sa dengue sa Dakbayan sa Talisay karong tuiga ikompara sa niaging tuig kini base sa datos sa City Health Office.

Si Dr. Lino Alanzado, pangulo sa CHO nibutyag nga nakatala lang sila og 58 ka kaso sa dengue gikan sa buwan sa Enero hangtud sa buwan sa Hunyo niining tuiga diin mas ubos kini kong itandi sa susama nga buwan sa tuig 2023 nga niabot sa 260 ka kaso.

Apan matud ni Alanzado nga wala sila’y kompiyansa ug padayon sila nga naghimo sa mga pamaagi nga mapugngan ang pagdaghan sa mga lamok nga nagdala og sakit nga dengue.

Nasayran nga 10 na ka eskwelehan ug sitio ang nasuroy sa CHO alang sa pagpahigayon og misting.

Matud ni Alanzado nga ang kadagkoan sa eskwelahan na mismo ang mohangyo kanila sa pagpahigayon sa pagpatay ug pagbugaw sa mga lamok.

Ilang gilaoman nga mas daghan pa unya ang maghangyo kanila sa pagpa-misting ilabi na nga nagsige na ang pag-uwan.

Gawas sa mga eskwelahan si Bise Mayor Richard Francis “Choy” Aznar, chairman sa committee on health nibutyag nga gisuroy usab sa anti-dengue task force ang mga sitio.

Ilang gisiguro nga ang mga sitio nga adunay natala nga kaso sa dengue.

Gilaoman usab ni Aznar nga mas modaghan pa unya ang mohangyo sa anti-dengue task force sa pagpa-misting ilabi na karon nga ting-uwan. — BDB BANAT NEWS