Garcia nimando sa pagpahunong sa operasyon sa PSPI
CEBU, Philippines — Si Gobernador Gwendolyn Garcia nimando nga ihunong sa Power Source Philippines In, (PSPI) ang operasyon sa power plant niini sa Isla sa Malapascua sa Lungsod sa Daanbantayan.
Base sa executive order nga giluwatan ni Garcia kagahapon gitumbok sa gobernadora ang pipila ka giingong kalapasan sa regulasyon nga nahimo sa PSPI.
Lakip niini ang kalapasan sa Section 4 sa Presidential Decree No. 1568 tungod sa pag-operate og duha ka megawatts nga power plant nga walay Environmental Compliance Certificate; kalapasan sa Section 6 sa DENR Administrative Order (DAO) No. 2013-22 tungod sa dili maayo nga hazardous waste storage ug labeling; paglapas sa standard sa oil ug grease ug ang dili maayo nga wastewater discharge.
Ang maong mga kalapasan nasayran human mipahigayon og ocular inspection ang Environmental Management Bureau (EMB) ngadto sa planta sa PSPI sa Malapascua.
Sa maong EO ni Garcia gisaysay usab niini nga ang mga residente ug patigayon sa lugar nangreklamo usab sa serbisyo sa PSPI apil na niini ang pag-required sa mga patigayon nga mogamit lang sa ilang kaugalingong generator atol sa peak hours, pagluwat og disconnection notice bisan nakabayad sa saktong oras ug ang kanunay nga brownout nga molungtad og walo ka oras.
“PSPI’s substandard services have led to health problems, business losses, and the closure of tourism-related establishments which are vital to the island’s economy”, matud ni Garcia.
Kagahapon, si Garcia niadto kini sa Malapascua human sa pagluwat sa iyang EO.
Gimandoan ni Garcia ang PSPI nga ihunong ang operasyon sa planta niini karong adlawa diin gitahasan sa gobernadora ang LGU sa Daanbantayan ug ang kapolisan nga istriktong ipatuman ang iyang kamandoan. BDB BANAT NEWS
- Latest
