Mayor Cortes mohatag og tabang pinansiyal sa napatay nga polis

CEBU, Philippines — Tinguha sa kagamhanan sa Dakbayan sa Mandaue nga mohatag og financial assistance ngadto sa pamilya ni Staff Sergeant Orven Seth Felecio kinsa gipusil patay sa usa ka 16 anyos nga lalaki niadtong nilabay nga buwan.

Si Mandaue City Mayor Jonas Cortes, niawhag sa mga sakop sa City Council sa pagpalabang ug resolution nga magtugot sa pagpagawas sa ayuda nga usa ka gatus ka libo ka pesos nga ihatag sa pamilya ni Felecio.

Ang sulat sa mayor maoy usa sa tukion sa konseho sa dakbayan sa ilang ipahigayon nga session.

Matud pa ni Konsehal Oscar Del Castillo, chairman sa committee on Police, Fire and Penology, nga angayan gayud hatagan ug maayong pagtagad ang pamilya ilabi na sa police nga naghatag og serbisyo sa katawhan.

Si Felecio nadestino sa Casuntingan Police Station sa dakbayan sa Mandaue ug off duty niadtong higayona nga igo lang unta mokuha sa iyang asawa dihang gipusil sa minor de edad.

Nalabyan ni Felecio ang batan-on kinsa gibadlong na sa mga nagpatrolya nga barangay tanod sa Barangay Banilad tungod sa gipatuman nga curfew. Apan dihang gibadlong usab sa polis ang batan-on kalit lang kini nga mipusil ni Felecio.  MEL BANAT NEWS