Tighimo og pekeng gov't IDs nadakpan

CEBU, Philippines — Nadakpan sa operasyon ang gipasanginlang tig-imprinta og mga pekeng  IDs sa gobiyerno atol sa operasyon sa NBI-7 human sa pipila ka bulan nilang pagpaniid ug pag-monitor sa kalihokan sa maong suspek.

Matud pa sa NBI-7 gisugdan nila ang case build-up niadto pang Abril. Gihulagway nilang kuti gyud nga surveillance ang ilang gihimo  hangtud nga natigayon ang moang operasyon nga niresulta sa pagkasikop kang Geraldine Tausa, 38, taga Lagtang, Talisay City.

Moabot sa 240 nagkalain-laing peke nga BIR TIN cards, 250 ka pekeng PhilHealth cards, printer, cutter, cellphone ug uban pa ang nasakmit sa mga sakop sa National Bureau of Investigation Central Visayas sa maong operasyon.

Sa video footage sa operasyon sa NBI-7 atol sa ilang operasyon makita sa panimalay ni Tausa ang mga nasakmit nga butang sama sa pagprinta sa mga peke nga ID. Lakip sa gisakmit ang mga computer ug laptop nga gigamit sa iyang ilegal nga operasyon.

Sumala pa ni NBI-7 Regional Director Renan Augustus Oliva, makuti gayud nga surveillance ang ilang gihimo ilabi na nga online ang transaksyon sa suspek ug nigamit pa gyud og mga peke nga pangalan.

Ang dinakpan adunay tulo ka mga gitawag nga resellers gikan sa Lapu-Lapu City, Mandaue City ug Cebu City nga maoy mo transact sa publiko nga gustong makakuha og government IDs sa kantidad nga 180 ngadto sa 300 pesos.

Gisugdan ang operasyon sa dihang ang BIR-7 ang nipatabang sa NBI-7 human duna silay nasakpang peke nga TIN card.

Gihulagway ni Oliva nga organized crime group nga dili lang kini dinhi sa Sugbo, hinungdan nga padayon ang ilang imbestigasyon ug nakig-alayon sa ubang NBI Offices.

Giangkon ni Tausa ang gihimo ug matud pa niya nga upat ka bulan palang siya sa maong illegal nga patigayon ug naa sa P50 matag card ang iyang kitaon.

Kasong paglapas sa Revised Penal Code ug Cybercrime Law ug Violation of the National Internal Revenue Code ilabi na sa Falsification of Public Documents ang ipasaka batok kang Tausa.

Ang NBI-7 ug BIR-7 desididong mopasaka og kaso batok sa suspek. (BANAT NEWS)